Borgin skuldar 386 milljarða króna

Rekstur Reykjavíkurborgar hefur ekki batnað í heimsfaraldrinum, aðallega vegna þess að væntingar borgarstjórnarmeirihlutans um frekari tekjuaukningu gengu ekki eftir.

Afkoma borgarinnar var því um 15 milljörðum króna lakari en áætlanir í Ráðhúsinu gerðu ráð fyrir, niðurstaða samstæðu borgarinnar neikvæð um nær 3 milljarða, en heildarskuldir borgarinnar hafa vaxið verulega og nema nú alls um 386 milljörðum króna.

Ársreikningur Reykjavíkurborgar fyrir árið 2020 var lagður fyrir borgarráð í gær, sem vísaði honum til borgarstjórnar, þar sem fjallað verður um hann næsta þriðjudag.

Frétt af mbl.is

Staðan 15 milljörðum verri en áætlað var

Sorgleg niðurstaða

Samkvæmt tilkynningu Dags B. Eggertssonar borgarstjóra hafði heimsfaraldurinn mest áhrif á versnandi stöðu fjárhags Reykjavíkurborgar, áætlanir byggðust á frekari aukningu tekna, sem ekki hafi skilað sér.

Í umfjöllun um mál þetta í Morgunblaðinu í dag segir Eyþór L. Arnalds, oddviti sjálfstæðismanna í borgarstjórn, þetta sorglega en ekki óvænta niðurstöðu. „Þetta er aðeins enn eitt dæmið um slæma, í raun grafalvarlega fjárhagsstöðu Reykjavíkurborgar í þessu fjögurra flokka samstarfi.“