Diljá Mist Einarsdóttir, hæstaréttarlögmaður og aðstoðarmaður utanríkis- og þróunarsamvinnuráðherra, hef­ur ákveðið að gefa kost á sér í 3. sæti í próf­kjöri sjálf­stæðismanna í Reykja­vík fyr­ir kom­andi alþingis­kosn­ing­ar sem fram fer þann 4. og 5. júní nk. Diljá er gift Ró­berti Bene­dikt Ró­berts­syni fjár­mála­stjóra og eiga þau tvö börn.

Þetta kemur fram í tilkynningu.

Diljá Mist Einarsdóttir fæddist í Reykjavík 21. desember 1987. Hún öðlaðist málflutningsréttindi fyrir Hæstarétti í desember 2016, yngst kvenna á Íslandi. Diljá er með meist­ara­próf í lög­fræði frá Háskóla Íslands en hún starfaði áður sem fulltrúi á lögmannsstofunni Lög­máli. Auk meist­ara­prófs í lög­fræði er Diljá með LL.M.-gráðu í auð­linda­rétti og alþjóð­legum umhverf­is­rétti frá Háskóla Íslands. Þá er Diljá stúd­ent frá Verzlunarskóla Íslands.

„Ég tel mikilvægast að við horfum á stóru myndina – forræðishyggja og vaxandi afskipti ríkisins af venjulegu fólki er mikið áhyggjuefni. Í frjálsu samfélagi er hagsmunum okkar best borgið, þar nýtur hvert og eitt okkar sín best – fjölbreytileiki mannlífsins er okkar helsti styrkleiki. Við höfum staðið okkur best þegar við treystum á okkur sjálf. Nú eigum við að horfa óhrædd og björtum og augum til framtíðar,” er haft eftir Diljá í tilkynningu.

Ætlar að taka sér leyfi

Diljá hefur aðstoðað Guðlaug Þór Þórðarson, utanríkis- og þróunarsamvinnuráðherra, frá árinu 2018. Störf Diljár innan ráðuneytisins hafa m.a. snúið að þróunarsamvinnu sem er orðinn veigamikill hluti af utanríkismálum Íslands og leiddi hún starfshóp um innleiðingu mannréttindamiðaðrar þróunarsamvinnu í tvíhliða samstarfi. 

Diljá hefur gegnt fjölda trúnaðarstarfa fyrir Sjálfstæðisflokkinn. Hún er varaborgarfulltrúi flokksins í Reykjavík og hefur hún átt sæti í endurskoðunarnefnd Reykjavíkurborgar. Hún tók sæti á lista Sjálfstæðisflokksins fyrir þingkosningarnar árið 2009. Þá var Diljá annar vara­for­maður Sam­bands ungra sjálf­stæð­is­manna 2007-2009 og vara­for­maður Heimdallar 2009-2010 og sat í stjórn Varð­ar, full­trúa­ráðs Sjálf­stæð­is­flokks­ins í Reykja­vík 2016-17, svo dæmi séu tekin.

Diljá mun taka sér leyfi frá störfum sem aðstoðarmaður frá 17. maí til þess að vinna að framboði sínu.

Tengdar fréttir

Alþingiskosningar 2021

Hafa „ágætis tíma“ til úrbóta

• Spyr hvort að ekki þurfi að boða til kosninga
• Niðurstaða MDE kallar á breytingar
• Niðurstaða MDE hefur engin bein réttaráhrif
• Stjórnvöld þurfi að axla ábyrgð

» Fleiri tengdar fréttir

• Blogga um frétt