Um 358 milljónir á ári í girðingar

Heildarkostnaður opinberra aðila við girðingar á árabilinu 2015 til 2020 nam 2.149 milljónum króna. Það gerir um 358 milljónir á ári og má ætla að þessi kostnaður sé vanáætluður frekar en hitt.

Þetta kemur fram í skýrslu starfshóps um umbætur og hagræðingu vegna girðinga í eigu hins opinbera til umhverfis- og auðlindaráðherra. Í skýrslunni segir að starfshópurinn telji mikilvægt að tengja saman ólíka hagsmuni, t.d. sauðfjárbúskap, landvernd, ferðaþjónustu, umferðaröryggi og skógrækt.

Enn fremur geti falist tækifæri í því að sameinast um að girða ákveðin landsvæði af til beitar en annars staðar geti tækifæri falist í því að banna lausagöngu búfjár, en styrkja eigendur búfjár jafnframt til þess að girða sitt búfé af, að því er fram kemur í Morgunblaðinu í dag.