Innlent | mbl | 7.5.2021 | 15:27

Árangurinn byggist á fjórum til sex hornsteinum

Páll Matthíasson, forstjóri Landspítalans og Svandís Svavarsdóttir heilbrigðisráðherra. mbl.is/Kristinn Magnússon

Svandís Svavarsdóttir heilbrigðisráðherra og Páll Matthíasson forstjóri Landspítalans þökkuðu heilbrigðisstarfsfólki fyrir þrautseigju og samvinnu í kórónuveirufaraldrinum á ársfundi Landspítalans sem fram fór í dag.

Í ávarpi sínu sagði Svandís yfirskrift fundarins, samvinna á farsóttartímum, lýsandi fyrir þau verkefni sem spítalinn hefur staðið frammi fyrir síðasta árið. Starfsfólk heilbrigðisþjónustunnar hafi sýnt ótrúlega færni í samvinnu og einstakar stéttir unnið saman sem ein heild. Allir hafi lagst á eitt í baráttunni við ósýnlegan óvin og starfsfólk verið heilbrigðiskerfinu til sóma.

Þá segir Svandís að ákveðin fyrirheit liggi í loftinu. Gangur bólusetninga sé góður og að ráðist verði í tilslakanir á sóttvarnareglum á mánudag, fyrr en ráðgert var. Svandís sagði rétt að líta björtum augum til framtíðar, þó að verkefni innan heilbrigðisþjónustunnar verði áfram krefjandi.

Rétt eins og Svandís lagði Páll í ræðu sinni áherslu á kórónuveirufaraldurinn. Á ársfundi Landspítalans á síðasta ári hafi þátttakendur verið nokkuð drjúgir með sig en þá var fyrstu bylgju faraldursins að ljúka hér á landi. Þá hafi þó enginn vitað að bylgjan yrði aðeins sú fyrsta af nokkrum.

Síðasta haust hafi síðan skollið á alvarleg bylgja og ótti heilbrigðisstarfsfólks raungerst þegar veiran kom inn á spítalann með margvíslegum hætti. Í einu tilfelli hafi varnir brugðist og hópsmit kom upp á Landakoti með þungbærum og alvarlegum afleiðingum.

Páll sagði að faraldurinn hafi kennt samfélaginu mikilvægi samvinnu. Hann telur að árangur Íslands í baráttunni við kórónuveiruna byggist fyrst og fremst á fjórum hornsteinum; snemmskimun, Covid-19 göngudeild Landspítalans, utanumhald um smitvarnabúnað og opinni, heiðarlegri og tímanlegri upplýsingagjöf til almennings þar sem þríeykið svokallaða hafi staðið í framlínunni.

Páll bætti þó við að bólusetningar gætu talist fimmti hornsteininn og vísindi sá sjötti. Vísindin efla alla dáð hafi Jónas Hallgrímsson eitt sinn sagt og það hafi sannast undanfarið ár.