Innlent | mbl | 11.5.2021 | 9:41 | Uppfært 10:00

Smitin að minnsta kosti 9 talsins

Sauðárkrókur í Skagafirði. Morgunblaðið/Sigurður Bogi

Sigfús Ingi Sigfússon, sveitarstjóri í Skagafirði, segir að hann viti til þess að eitt smit hafi bæst við í gær í Skagafirðinum en viðkomandi hafi verið í sóttkví.

Hann veit að ekki liggur fyrir niðurstaða úr vafasýnum sem þurfti að rannsaka betur. Eins er ekki víst að niðurstaða liggi fyrir í öllum tilvikum en fjöldi fólks var skimaður í gær vegna smits sem kom upp í Skagafirði á föstudag. Alls eru staðfest smit níu talsins í Skagafirði.

Nú eru um 400 í sóttkví og mögulega þurfi fleiri að fara í sóttkví en um leið fara væntanlega einhverjir að losna úr sóttkví þegar líður á vikuna. Sigfús er sjálfur í sóttkví en fer í skimun á fimmtudag.

Frétt af mbl.is

Á von á því að smitum muni fjölga

Líkt og fram hefur komið greindist starfsmaður sjúkrahússins á Sauðárkróki með smit sem og nemandi við Árskóla.

„Ég er að verða bjartsýnni á að við séum að ná utan um þetta og setja áhættuhópa í sóttkví,“ segir Sigfús Ingi í samtali við blaðamann mbl.is.

Fólk hefur mætt vel í sýnatöku og fer eftir leiðbeiningum sóttvarnalæknis og almannavarna. Íbúar Skagafjarðar hafa gætt vel að sér og með því að hægja á samfélaginu í einhvern tíma afgreiðum við þetta hraðar segir Sigfús en í Skagafirði tóku ekki nýjar sóttvarnareglur gildi í gær líkt og annars staðar á landinu.

Aðgerðir sem eru í gildi í Skagafirði

Sóttvarnalæknir hefur ákveðið að þær tilslakanir á samkomutakmörkunum sem taka gildi mánudaginn 10. maí samkvæmt reglugerð heilbrigðisráðuneytisins muni ekki taka gildi í Sveitarfélaginu Skagafirði og Akrahreppi fyrr en mánudaginn 17. maí.
Öllu skólahaldi í Árskóla verður aflýst frá og með mánudeginum 10. maí a.m.k. til og með föstudeginum 14. maí.
Leikskólinn Ársalir verður lokaður á sama tíma, nema fyrir skilgreinda forgangshópa, s.s. heilbrigðisstarfsmenn, lögreglumenn og sjúkraflutningamenn næstu viku.
Öll próf í Fjölbrautaskóla Norðurlands vestra á Sauðárkróki verða heimapróf og skólinn lokaður nemendum.
Heimavist Fjölbrautaskóla Norðurlands vestra verður rýmd eins og kostur er.
Sundlaugar sveitarfélagsins í Skagfirði verða lokaðar frá og með 10. maí og til og með sunnudeginum 16. maí.
Íþróttaæfingar yngri flokka verði óheimilar frá og með 10. maí til og með sunnudeginum 16. maí.
Öllum íþróttamannvirkjum sveitarfélagsins verður lokað nema fyrir æfingar meistaraflokka frá og með mánudeginum 10. maí til og með sunnudeginum 16. maí
Íþróttakappleikir fullorðinna verða spilaðir án áhorfenda
Líkamsræktarstöðvar verða lokaðar frá og með 10. maí til og með sunnudeginum 16. maí.
Skíðasvæðinu í Tindastóli hefur verið lokað.
Umhverfisdagar Sveitarfélagsins Skagafjarðar sem fara áttu fram 15. maí og plokk-áskorendakeppni milli fyrirtækja sem átti að hefjast í gær er frestað um óákveðinn tíma.
Ráðhúsið á Sauðárkróki verður lokað frá og með mánudeginum 10. maí þar til annað verður ákveðið.
Fundum sveitarstjórnar, nefnda og ráða sveitarfélagsins verður frestað um viku.
Öllum menningarviðburðum á Sauðárkóki verður aflýst frá og með 10. maí, til og með sunnudeginum 16. maí. Þar með leiksýningum, bíósýningum og öðrum viðburðum þar sem fólk safnast saman.
Skagafjarðarveitur og þjónustumiðstöð Skagafjarðar verða lokaðar á tímabilinu og aðeins verður opið fyrir neyðarþjónustu í gegnum síma.
Lágmarksþjónusta verður hjá Skagafjarðarhöfnum sem og garðyrkjudeild sveitarfélagsins á umræddu tímabili.

Jafnframt þessum aðgerðum hafa stofnanir og fyrirtæki í Skagafirði ákveðið að bregðast við með eftirfarandi hætti:

Afgreiðslutími Skagfirðingabúðar verður lengdur til að dreifa betur verslun og draga úr þeim fjölda sem inni er á hverjum tíma. Viðskiptavinir eru beðnir um að taka tillit til þess.
Bílaverkstæði, og Vélaverkstæði KS og Tengill verða lokuð frá og með 10. maí, til og með föstudeginum 14. maí. Tengill mun þó starfa eftir neyðarskipulagi fyrirtækisins næstu viku. Byggingavöruverslun KS á Eyrinni verður lokuð en afgreiðsla verður í gegnum síma.
Vörumiðlun mun loka afgreiðslu og jafnframt loka endurvinnslumóttöku en mun afgreiða vörur út úr húsi.
Húsnæðis- og mannvirkjastofnun mun loka afgreiðslu í þessa viku og starfsemi verður skert.
Byggðastofnun mun loka afgreiðslunni þessa viku og starfsemi verður skert.
1238 Battle of Iceland og Grána bistro verður lokað þessa viku.
GrandInn Bar verður lokaður þessa viku.
Veitingastaðurinn Lemon verður með matsal lokaðan en selur mat út.