Ríkislögreglustjóri, í samráði við lögreglustjóra og slökkviliðsstjórana á Norðurlandi vestra, hefur ákveðið að lýsa yfir óvissustigi almannavarna vegna hættu á gróðureldum.

Segir í fréttatilkynningu að þessi ákvörðun sé byggð á því að lítið hafi rignt á svæðinu undanfarið og veðurspá næstu daga sýnir heldur ekki neina úrkomu að ráði.

„Óvissustig almannavarna þýðir að aukið eftirlit er haft með atburðarás sem á síðari stigum gæti leitt til þess að heilsu og öryggi fólks, umhverfis eða byggðar verði ógnað. Að lýsa yfir óvissustigi er hluti af verkferlum í skipulagi almannavarna til að tryggja formleg samskipti og upplýsingagjöf á milli viðbragðsaðila og almennings,“ segir í tilkynningu.

Almenningur er hvattur til að sýna aðgát með opinn eld á þessum svæðum og öðrum þar sem gróður er þurr. Bent er á að ekki þurfi mikinn neista til þess að af verði stórt bál.

Hringja skal strax í 112 ef fólk verður vart við gróðurelda.

Nálgast má frekari upplýsingar um ýmsar varnir til að draga úr hættu af gróðureldum á heimasíðu almannavarnadeildar ríkislögreglustjóra og á grodureldar.is.

Tengdar fréttir

Gróðureldar á Íslandi

Hætta á gróðureldum á Austurlandi

• Gróðureldur í Mosfellsbæ
• Gras, fíflar og lúpína skotið upp kollinum
• Hættustigi aflétt á sunnanverðu landinu
• 31 hektari brunnið við gosstöðvar

» Fleiri tengdar fréttir

• Blogga um frétt