Innlent | mbl | 25.5.2021 | 9:22 | Uppfært 10:12

Segist hafa verið einn að verki

Frá héraðsdómi í morgun. Einn sakborningur mætti í dómsal. mbl.is/Kristinn Magnússon

Þingfesting í Rauðagerðismálinu fór fram í Héraðsdómi Reykjavíkur í morgun. Fjórir einstaklingar eru ákærðir fyrir að hafa svipt Armando Beqirai lífi laugardaginn 13. febrúar 2021.

Ákærðu eru þrír karlmenn á fertugs- og fimmtudagsaldri og ein kona á þrítugsaldri.

Fyrir liggur játning í málinu frá Angjelin Sterkaj, fyrir að hafa skotið Armando Beqirai. Hann játaði sök við þingfestingu en sagðist hafa verið einn að verki.

Ákæra gefin út í Rauðagerðismálinu

Einn ákærður karlmaður var mættur í dómsal við þingfestingu, hann neitaði sök í málinu, með aðstoð túlks á fjarfundi.

Hinir tveir karlmennirnir voru á fjarfundi frá fangelsinu á Hólmsheiði. Angjelin og annar maður, sem neitaði sök í málinu.

Fjórir ákærðir í Rauðagerðismálinu

Konan sem ákærð er mætti ekki fyrir héraðsdóm, en lagt var fram bréf af hennar hálfu þar sem hún neitar sök í málinu.

Kolbrún Benediktsdóttir í dómsal í morgun. mbl.is/Kristinn Magnússon

Í ákærunni segir að karlmaður á fertugsaldri hafi sýnt konu á þrítugsaldri tvær bifreiðar sem tilheyrðu Armando og var lagt í porti við Rauðarárstíg og gefið henni fyrirmæli um að fylgjast með þeim og jafnframt senda skilaboð í gegnum samskiptaforritið Messenger til meðákærða þegar hreyfing yrði á bifreiðunum. Konan mun hafa orðið við þeirri beiðni.

Frétt af mbl.is

Játning liggur fyrir í Rauðagerðismálinu

Tveir aðrir karlmenn eru ákærðir. Segir í ákæru að tveir menn hafi elt bifreið Armando að heimili hans við Rauðagerði. Annar maðurinn, Angjelin Sterkaj, fór út úr bílnum, faldi sig við bílskúr við hús Armando og þegar Armando kom út úr bílskúrnum skaut Angjelin hann níu sinnum í líkama og höfuð með þeim afleiðingum að hann lést. Þá var hann sóttur aftur og mennirnir tveir keyrðu í Varmahlíð í Skagafirði með viðkomu í Kollafirði þar sem þeir losuðu sig við skammbyssuna með því að henda henni í sjóinn.

Nokkrir tæknilegir örðugleikar komu upp við fjarfundi í héraði, var sem fyrr segir túlkur á fjarfundi en hann var í sóttkví, sem og tveir ákærðu á fjarfundi frá Hólmsheiði.