Ætlar ekki að biðja Benedikt afsökunar

Benedikt Jóhannesson, fyrrverandi formaður Viðreisnar.
Benedikt Jóhannesson, fyrrverandi formaður Viðreisnar. mbl.is/Kristinn Magnússon

Liðsmaður uppstillingarnefndar Viðreisnar í Reykjavík segir að Benedikt Jóhannesson, fyrrverandi formaður flokksins, hafi komið því skýrt á framfæri að hann vildi aðeins oddvitasæti á lista flokksins og ekkert annað.

Natan Kolbeinsson, sem sat í uppstillingarnefndinni, skrifar í færslu á Facebook að flokknum hafi þá verið vandi á höndum að koma Benedikt fyrir enda séu fyrir þrjár konur í oddvitasætum á höfuðborgarsvæðinu sem hafi „náð að lyfta flokknum upp í rúm 11% og þar að auki starfað að heilindum og dugnaði“.

Þar sem oddvitar flokksins í landsbyggðarkjördæmunum þremur eru karlar hafi verið erfitt að setja inn karlkyns oddvita.

„Ég fyrir mitt litla líf get ekki beðið hann eða nokkurn mann skriflega afsökunar á því að neita að hverfa frá jafnréttissjónarmiðum flokksins,“ skrifar Natan og vísar þar til orða Benedikts sem segist ekki hafa viljað taka annað sæti á lista flokksins þar sem uppstillingarnefnd vildi ekki biðja hann afsökunar á að hafa upphaflega boðið honum neðsta sæti listans.

Þá bætir Natan við að þegar tillaga um prófkjör var borin upp í Reykjavíkurráði flokksins hafi hún fengið dræmar undirtektir.

„Allt ferlið fór eftir þeim lýðræðislegu leikreglum sem flokkurinn setti sér við stofnun og Benedikt er einn af aðalhöfundum að.“

mbl.is
Fleira áhugavert
Fleira áhugavert