„Hrollvekjandi framtíðarsýn“

Logi Einarsson, þingmaður Samfylkingarinnar
Logi Einarsson, þingmaður Samfylkingarinnar Kristinn Magnúsosn,Kristinn Magnússon

Logi Einarsson, þingmaður Samfylkingarinnar segir fráfarandi ríkisstjórn bera ábyrgð á bágri stöðu heilbrigðiskerfisins. Hann segir Samfylkinguna vilja taka þátt í næstu ríkisstjórn til að byggja upp en ekki skera niður.

Logi benti á það í ræðu sinni að nú þegar verið er að blása lífi í atvinnulífið á ný sé mikilvægt að ræsa vélina ekki óbreytta heldur séu nú tækifæri til að fjölga stoðum, styðja við nýsköpun og dreifa ferðamönnum betur um landið.

Hann gagnrýnir efnahagsáætlanir ríkisstjórnarinnar og segir að nú stefni í K-laga kreppu þar sem bilið milli þeirra efnameiru og efnaminni stækkar sífellt. Hann segir að ekki hafi verið gripið nægilega markvisst til aðgerða fyrir þau sem þurftu mest á þeim að halda.

Logi fór yfir stöðu heilbrigðiskerfisins og sagði að ríkissstjórnin bæri ábyrgð á öllum eftirfarandi  þáttum. Bráðadeild Landspítalans hafi aldrei verið jafn alvarlega undirmönnuð og stefnir í þetta sumar. Hjúkrunarheimili víða um land séu á mörkum þess að fara í þrot vegna vanfjármögnunar ríkisins. Íslensk ungmenni fái ekki nauðsynlega geðheilbrigðisþjónustu og að enginn geðlæknir sé í fastri stöðu úti á landsbyggðunum.

Hann segir að heilbrigðiskerfinu verði ekki bjargað í ríkisstjórn málamiðlana, kyrrstöðu og niðurskurðar.

Logi taldi einnig upp mál sem ekki hafa náðst samstaða um í ríkisstjórninni enda sé hún ósamstíga og krefjist málamiðlana við hvert fótmál. Þau mál sem hann nefndi voru afglæpavæðing, rammaáætlun, hálendisþjóðgarðurinn og auðlindaákvæði.

mbl.is