Teitur Björn Einarsson, lögmaður og frambjóðandi í prófkjöri Sjálfstæðisflokksins í Norðvesturkjördæmi, kveðst fyrst og fremst ánægður með þátttöku í prófkjöri sjálfstæðismanna í kjördæminu sem fram fór á miðvikudaginn og laugardaginn.
Alls greiddu 2.289 atkvæði í prófkjörinu.
„Hún sýnir að Sjálfstæðisflokkurinn á mikil sóknarfæri í kjördæminu í komandi kosningum,“ segir Teitur í samtali við mbl.is.
Teitur hafnaði í þriðja sæti í prófkjörinu á eftir Þórdísi Kolbrúnu, varaformanni og ráðherra flokksins, og Haraldi Benediktssyni, núverandi oddvita flokksins í kjördæminu.
„Þórdís Kolbrún varaformaður hlýtur algjöra yfirburðakosningu. Hún er ótvíræður leiðtogi okkar sjálfstæðismanna í kjördæminu og vel að því komin.
Ég sjálfur er þakklátur fyrir allan stuðninginn sem ég fékk og þakka öllum þeim sem aðstoðuðu mig og lögðu hönd á plóg og gerðu þetta prófkjör skemmtilegt,“ segir Teitur.
Aðspurður hvort ljóst sé að hann muni færast upp í annað sæti á listanum, sem færir honum þingsæti miðað við kannanir og gengi flokksins í kjördæminu undanfarið, þar sem Haraldur Benediktsson, núverandi oddviti í Norðvesturkjördæmi, sagði áður en úrslit prófkjörsins lágu fyrir að hann myndi hafna öðru sæti, segist Teitur ekki hafa upplýsingar um afstöðu Haralds að öðru leyti en því sem fram hefur komið í fjölmiðlum.
„Úrslit prófkjörsins eru alveg skýr og það er það sem ég horfi í. Það er undir hverjum og einum komið hvað hann gerir með þau,“ segir Teitur.