Rúmlega 48 þúsund manns hafa sótt nýju ferðagjöfina á þeim þremur vikum sem liðnar eru síðan hún var gefin út. Þetta kemur fram á vefsíðu Mælaborðs ferðaþjónustunnar. Þá hafa 16 þúsund þegar notað ferðagjöfina.
Bensínstöðvar landsins eru meðal þeirra sem notið hafa góðs af hinni nýju ferðagjöf en af þeim 37 milljónum sem ferðagjöfin hefur verið nýtt í hafa N1 og Olís hlotið um 15 milljónir samtals, eða rétt rúmlega 40 prósent allra ferðagjafa. Þar á eftir með um 6 milljónir króna kemur Sky Lagoon, nýja lónið í Kársnesi sem notið hefur mikilla vinsælda síðan það var opnað í vor.
Þar á eftir koma skyndibitastaðir tveir, KFC með um 4 milljónir og Domino's Pizza með um 3 milljónir. Þar næst er flugið, bæði í raunheimum og hermi, en um 3 milljónir hafa farið í Icelandair og aðrar 3 milljónir í flughermifélagið FlyOver Iceland.
Loks hafa um 2 milljónir farið í Tix miðasölu og hvor milljónin í Íslandshótel annars vegar og Icelandair Hotels hins vegar.