Innlent | mbl | 24.6.2021 | 19:42 | Uppfært 21:05

Bensínstöðvum í Reykjavík mun fækka um þriðjung

Dagur B. Eggertsson borgarstjóri. mbl.is/Eggert Jóhannesson

Borgarráð samþykkti í morgun samninga við þrjú stærstu olíufélögin um þriðjungsfækkun bensínstöðva í Reykjavík á næstu árum. Dagur B. Eggertsson borgarstjóri tilkynnti þetta á samfélagsmiðlum í dag.

„Í mínum huga eru þetta mjög stór og jákvæð tíðindi, bæði fyrir borgina og græna framtíð,“ skrifar Dagur. „Allir þessir samningar eru olíufélögunum til hróss. Saman erum við að feta okkur í átt að grænni framtíð með góðri borgarþróun.“

Hann segir borgina beita samningum og grænum hvötum til að ná margþættum markmiðum, í loftslagsmálum, þéttingu byggðar, eflingu íbúðahverfa og bættum lífsgæðum. Hann bendir á að frábært sé þegar það takist í góðri samvinnu.

Bensínstöðvar í dag. Myndir úr færslu borgarstjórans

Staða eftir breytingar.

Í stað bensínstöðvanna munu koma íbúðir og hverfistengd þjónusta. Áhersla var lögð á að semja um stöðvar sem eru inni í íbúðahverfum en þær bensínstöðvar sem umbreytast eru eins og sjá má á meðfylgjandi myndum.

Álfheimar 49, þar á að byggja íbúðir auk atvinnu- og þjónustuhúsnæðis.

Birkimelur 1, þar á að byggja íbúðir auk atvinnu- og þjónustuhúsnæðis.

Skógarhlíð 16, þar á að byggja íbúðir auk atvinnu- og þjónustuhúsnæðis.

Skógarsel 10, þar á að breyta nýtingu lóðarinnar, núverandi mannvirki verða rifin og á henni verður reist 3-5 hæða hús, hugsanlega með matvöruverslun á hluta jarðhæðar en íbúðum í öðrum hlutum hússins.

Stóragerði 40, þar á að breyta nýtingu lóðarinnar og núverandi mannverki verða rifin, á henni á síðan að reisa 4-5 hæða hús, hugsanlega með atvinnuhúsnæði á hluta jarðhæðar en íbúðum í öðrum hlutum hússins.

Ægisíða 102, þar á að breyta nýtingu lóðarinnar og núverandi mannvirki verða rifin. Á síðan að reisa 2-4 hæða hús, með hugsanlegri matvöruverslun en íbúðum í öðrum hlutum hússins.