200 mílur | Morgunblaðið | 24.6.2021 | 5:30 | Uppfært 10:15

Hagræðing næst með samruna

Reyðarfjörður. Fiskeldi Austfjarða og Laxar fiskeldi eru með sjókvíaeldi víða á Austfjörðum og seiðastöðvar í Ölfusi og Kelduhverfi og er fyrrnefnda fyrirtækið einnig að byggja upp stórseiðastöð á Kópaskeri. Jjósmynd/Laxar fiskeldi

Samruni eða nánari samvinna austfirsku fiskeldisfyrirtækjanna Fiskeldis Austfjarða og Laxa fiskeldis mun væntanlega leiða til að rekstrarkostnaður minnkar með meiri stærðarhagkvæmni. Þá er talið að öflugra fyrirtæki fái sóknarfæri, meðal annars í markaðsmálum.

Ice Fish Farm AS, norskt félag sem heldur á öllum hlutabréfum í Fiskeldi Austfjarða og er skráð á Euronext-hlutabréfamarkaðinn í kauphöllinni í Ósló, tilkynnti í gærmorgun að ákveðið hefði verið að hefja viðræður við Laxa fiskeldi ehf. um framtíðarfyrirkomulag rekstursins. Snúast viðræðurnar væntanlega um samruna eða nánari samvinnu fyrirtækjanna tveggja.

Frétt af mbl.is

Eldi á Íslandi verður ekki stundað frá Noregi

Koma þessar viðræður ekki á óvart, hafa raunar legið í loftinu frá því í nóvember. Þá keypti norska fiskeldisfyrirtækið Måsøval Eiendom AS, sem átti fyrir meirihlutann í Löxum fiskeldi, meirihluta hlutabréfa í Ice Fish Farm. Måsøval er fjölskyldufyrirtæki sem raunar er nú að opna sig með skráningu á hlutabréfamarkað og útboði á nýju hlutafé. Það á nú um 55% í báðum íslensku fyrirtækjunum.

Eftir að tilkynnt var um kaupin á Ice Fish Farm sagði Lars Måsøval, stjórnarformaður norska fyrirtækisins við blaðamann Morgunblaðsins, spurður um líkur á samruna fyrirtækjanna á Íslandi, að allt væri óráðið í því efni þar sem kaupin væru háð samþykki norskra og íslenskra samkeppnisyfirvalda. Þyrfti að bíða eftir niðurstöðum þeirra áður en nokkuð yrði ákveðið um framhaldið, að því er fram kemur í umfjöllun um áform þessi í Morgnublaðinu í dag.