Veðrið lék loks við íbúa höfuðborgarsvæðisins í gær eftir nokkuð slaka frammistöðu undanfarið. Hæst náði hitinn sautján stigum á Sámsstöðum, veðurathugunarstöð Veðurstofunnar á Suðurlandi.
Spár sögðu til um að hitinn gæti náð upp í tuttugu stig í gær, en svo varð ekki. Veðurfræðingur segir að útlit sé fyrir gott veður um helgina en þó helst til hvasst norðvestan til á föstudag. Fólk á ferð með tengivagna og önnur stór ökutæki ætti því að fara varlega á ferð milli Snæfellsness og Akureyrar.
Á laugardag verður hæg vestanátt og hiti 12 til 20 stig, hlýjast austanlands. Á sunnudag gæti rignt víða um landið.