Spennt fyrir að hætta að skerða frelsi

Áslaug Arna Sigurbjörnsdóttir dómsmálaráðherra fagnar þeim tilslökunum sem kynntar voru í dag. Hún vonast til þess að brátt verði hægt að aflétta öllum takmörkunum á landamærunum og hlakka til þess þegar viðfangsefni stjórnmála hætta að snúast um að takmarka frelsi fólks. 

„Við erum búin að fórna svo miklu í marga mánuði. Vera hér að tilkynna takmarkanir og hertar aðgerðir í sífellu,“ sagði hún í viðtali við mbl.is. „Fólk nýtur þess vonandi að eiga hér frjálst sumar.“

Samstaða og góð þátttaka fólks í bólusetningar hefur verið lykilþáttur í baráttunni við Covid að mati Áslaugar og hún vonar að þessi samstaða sé komin til að vera.

Ónauðsynlegt að skima bólusetta

Áslaug vonar að fljótlega verði farið í frekari tilslakanir á landamærum en frá og með 1. júlí verður hætt að skima bólusetta farþega. Áslaug segir þetta hafa verið mikilvægt skref enda væri reynslan búin að leiða það í ljós að ónauðsynlegt væri að skima bólusetta farþega.

Takmarkanir eru þó enn í gildi varðandi þá sem ekki hafa fengið bólusetningarvottorð. „Nú reynir á hjarðónæmið sem virðist hafa verið að virka miðað við þau smit sem hafa þó komið til landsins en ekki náð neinni dreifingu,“ sagði hún. 

Reynir á hjarðónæmið

Ef hjarðónæmið heldur áfram að sanna sig telur Áslaug enga ástæðu til þess að halda áfram nokkrum takmörkunum. „Við viljum lifa í opnu og frjálsu samfélagi og ég vona bara að það verði sem fyrst.“

Áslaug benti á að til þess að ná fyllilega efnahagslegri viðspyrnu þyrfti að aflétta öllum takmörkunum á landamærunum. 

Hvað varðar ferðalög Íslendinga sagði Áslaug að samtal væri í gangi við Schengen löndin og önnur lönd utan svæðisins, að hleypa Íslendingum þangað. Fólk sem er bólusett, líkt og meirihluti Íslendinga er nú, á auðveldara með að ferðast en þó eru takmarkanir víða. Áslaug vonast til að aðrar þjóðir taki Íslendinga til fyrirmyndar og skili sér í bólusetningar.

Heimsfaraldur mestallan tíma hennar í ríkisstjórn

Heimsfaraldurinn hefur sett svip sinn á stjórnmálin um alllangt skeið og orðið til þess að önnur málefni hafa mörg þurft að lúta í lægra haldi. „Það hefur verið heimsfaraldur mestallan tímann sem ég hef verið í ríkisstjórn,“ segir Áslaug.

Þó það hafi verið lærdómsríkt segir Áslaug tilhlökkunarefni að sóttvarnarráðstafanir verði ekki inn á borði ríkisstjórnarinnar í hverri viku. „Ég er spennt fyrir því þegar viðfangsefnin verða ekki að takmarka frelsi fólks heldur að auka það og einfalda líf fólks,“ sagði hún kát. 

• Blogga um frétt