Innlent | mbl | 5.7.2021 | 21:49 | Uppfært 6.7.2021 7:55

Endurheimt votlendis á Snæfellsnesi vekur athygli Sameinuðu þjóðanna

Hnausar og Hamraendar eru fallegar jarðir við sjó á sunnanverðu Snæfellsnesi. Ljósmynd/Landgræðslan

Endurheimt votlendissvæðanna í landi Hamraenda og Hnausa á sunnanverðu Snæfellsnesi hefur vakið athygli á vettvangi Sameinuðu þjóðanna, segir í tilkynningu frá Landgræðslunni.

Í vor kölluðu Sameinuðu þjóðirnar eftir áhugaverðum og vel heppnuðum endurheimtarverkefnum sem ætlað er að vísa leiðina að því hvernig verkefni er æskilegt að takast á við á nýhöfnum áratugi endurheimtar vistkerfa. Verkefnið sem Landgræðslan sendi inn umsókn fyrir var samþykkt og er þar með komið í alþjóðlegan hóp 50 verkefna sem fylgst verður með til ársins 2030.

Landeigendur segjast strax sjá mun á svæðinu

Um er að ræða tvær samliggjandi jarðir sem ná yfir 100 hektara svæði þar sem grafnir höfðu verið skurðir sem náðu samtals 16 km að lengd. Votlendissvæði Hnausa og Hamraenda er stærsta samfellda votlendissvæðið sem hefur verið endurheimt á vegum Landgræðslunnar. „Mikilvægt er að jarðvegsvinna vegna endurheimtar votlendis sé unnin eftir ákveðnu verklagi og heppnaðist vinna verktakans í landi Hnausa og Hamraenda framar vonum,“ segir í tilkynningu Landgræðslunnar.

Skurðirnir sem voru grafnir á sínum tíma eru samtals 16 km að lengd og sést vel marka fyrir þeim úr lofti. Ljósmynd/Landgræðslan

Á nýlegum loftmyndum af svæðinu sést greinilega að vatnsstaða landsins hefur hækkað og náttúran hefur þegar hafist handa við að færa landið nær upprunalegu ástandi. Þá hafa landeigendur séð aukningu í fuglalífi á svæðinu. Ber þar mest á ýmsum tegundum vaðfugla svo sem jaðrakans, stelks og hrossagauks. Einnig hefur sést meira af öndum á svæðinu sem nýta sér tjarnir og opið vatn sem myndast hafa eftir að framkvæmdum lauk.

Stelkurinn fagnar endurheimt votlendisins. Ljósmynd/Landgræðslan

Margfaldur ávinningur af endurheimtinni

Samkvæmt Landgræðslunni er ávinningurinn af endurheimtinni margfaldur. „Utan þess að sporna gegn þeirri miklu kolefnislosun sem á sér stað úr framræstu landi skapast betri aðstæður fyrir dýralíf og gróður sem aftur skilar landi og vistkerfi í betra jafnvægi,“ segir í tilkynningunni. „Dýrmæt reynsla safnaðist því við framkvæmdirnar á svæðinu sem mun nýtast við endurheimt votlendis á öðrum svæðum og víst er að viðurkenning Sameinuðu þjóðanna á verkefninu er hvatning til Landgræðslunnar og hennar starfsfólks að halda áfram á sömu braut.“

Hér fyrir neðan má sjá stutt myndband sem sýnir vel stöðu landsins eins og það er í dag.