Tíundi hver með yfir milljón á mánuði

Á árinu 2020 voru heildarlaun launafólks að meðaltali 794 þúsund krónur á mánuði og helmingur launafólks var með á bilinu 570 til 908 þúsund krónur á mánuði. Tíundi hver launamaður var með regluleg laun undir 400 þúsund krónum á mánuði og tíundi hver með yfir milljón.

Þetta segir í tilkynningu frá Hagstofu Íslands. 

Laun hækkuðu meira í lægri tekjutíundum en í þeim hærri, aðallega vegna áherslu á krónutöluhækkanir í kjarasamningum.  Þannig var hlutfallsleg hækkun reglulegra launa í lægstu tíund um 9,5% meðan sambærileg hækkun í efstu tíund var 5,1%.

Þá segir einnig í tilkynningu Hagstofunnar að meðallaun í landinu hafi hækkað, sem skýra má meðal annars með þeirri staðreynd að fleiri í lægri tekjutíundum misstu störf á árinu 2020. 

Laun hæst í fjármálageiranum og lægst í ferðaþjónustunni

Laun og dreifing heildarlauna er mismunandi eftir atvinnugreinum en heildarlaun launafólks í fullu starfi voru að jafnaði hæst í fjármála- og vátryggingastarfsemi árið 2020, eða tæplega 1,1 milljón króna á mánuði.

Lægst voru heildarlaunin að jafnaði í rekstri gististaða og veitingarekstri eða um 597 þúsund krónur á mánuði. Dreifing heildarlauna var mest í fjármálastarfsemi en minnst í rekstri gististaða og veitingarekstri og skýrist það meðal annars af samsetningu starfa innan atvinnugreina.

Í fjármálastarfsemi voru til dæmis rúmlega tveir þriðju launafólks í störfum sérfræðinga, tækni- og sérmenntaðs starfsfólks meðan um helmingur starfa í rekstri gististaða og veitingarekstri voru störf við ræstingu og afgreiðslu.

• 1 blogg um fréttina

Bloggað um fréttina

• Ómar Ragnarsson: Ef meðallaunin eru 800 þús á mánuði, eru 300 þúsund …