Mikið annríki hefur verið í sýnatökum við Suðurlandsbraut í Reykjavík í dag.
„Þetta er bara eins og gengur þegar bylgjan rís aftur, að þá þurfum við að taka fleiri sýni,“ segir Ingibjörg Salóme Steindórsdóttir, verkefnastjóri hjá Heilsugæslu höfuðborgarsvæðisins.
Þrátt fyrir annríkið segir hún að mjög vel hafi gengið. „Þetta gengur örugglega þó að það séu rosalega margir.“
Í gær voru tekin um þrjú þúsund sýni og hafa þau ekki verið fleiri í nokkra mánuði. Við Suðurlandsbraut í Reykjavík eru bæði tekin sýni úr þeim sem eru með einkenni og ferðalöngum sem þurfa vottorð um smitleysi, PCR-próf eða svokölluð hraðpróf.
„Ég er ekki búin að taka saman tölurnar í dag, en mér sýnist þetta vera eitthvað meira en í gær,“ segir Ingibjörg.
Alls greindust 56 smit kórónuveirunnar innanlands í gær. Þetta kemur fram í uppfærðum tölum á covid.is. Átján voru í sóttkví við greiningu. 38 voru utan sóttkvíar.
Alls greindust 38 smit innanlands í fyrradag og voru níu þeirra í sóttkví við greiningu.