Björgunarsveitir á Norðurlandi voru kallaðar út um fjögur í dag til að aðstoða fólk sem var í sjálfheldu í Hafnarfjalli við Siglufjörð. Þetta segir í tilkynningu frá Landsbjörg.
Að sögn Karenar Óskar Lárusdóttur, verkefnastjóra hjá Landsbjörg, gengu aðgerðir vel og hjálpuðu björgunarsveitirnar fólkinu niður. Björgunaraðgerðirnar tóku tæpa tvo tíma.
Um tvo göngumenn var að ræða sem hafa að sögn Karenar líklegast gengið of langt upp í fjallið og lent þannig í sjálfheldu. Fólkið er ekki slasað og er nú komið í öruggt skjól.