Steinar Ingi Kolbeins
Annar starfsmaður í heimahjúkrun á vegum Heilsugæslu höfuðborgarsvæðisins hefur greinst með kórónuveiruna. Sigríður Dóra Magnúsdóttir, framkvæmdastjóri lækninga hjá Heilsugæslunni, staðfestir þetta í samtali við mbl.is.
Líkt og mbl.is greindi frá fyrr í dag höfðu áður tveir starfsmenn greinst með veiruna, einn á heilsugæslunni Sólvangi og hinn í heimahjúkrun. Nú hafa því tveir starfsmenn í heimahjúkrun greinst smitaðir og því þrír í heildina.
Sigríður sagði þó lán í óláni að starfsmennirnir í heimahjúkrun hafi verið saman á vakt og því hafi ekki þurft að grípa til aukinna aðgerða í kjölfar smits seinni starfsmannsins. Gripið hefði verið til viðeigandi ráðstafana vegna fyrra smits.