Innlent | mbl | 31.7.2021 | 15:58 | Uppfært 16:14

Skjálfti 3,3 að stærð í Kötlu

Katla. Yfirleitt er meiri virkni á svæðinu á sumrin, vegna bræðsluvatns. mbl.is/Rax

Tveir jarðskjálftar mældust í dag í Kötlu, annar var um eittleytið og var 3,3 að stærð og hinn örlítið seinna og 2,1 að stærð.

Að sögn Salóme Jórunnar Bernharðsdóttur, náttúruvársérfræðings á Veðurstofu Íslands, er um að ræða svipaða skjálfta og urðu fyrir tveimur dögum og á svipuðum stað, norðaustanverðri Kötluöskju.

„Við höfum séð töluvert af svona smærri skjálftum í Mýrdalsjökli núna og síðustu daga.“

Tveir skjálftar mældust í Kötlu

Salóme Jórunn Bernharðsdóttir náttúruvársérfræðingur á Veðurstofu Íslands. mbl.is/Sigurður Bogi

Virkni sem hefur sést áður á sumrin

Salóme segir að yfirleitt sé meiri virkni á svæðinu á sumrin og að það haldist í hendur við að það sé meira bræðsluvatn vegna hita í jöklinum sem safnist fyrir í Suðkötlum.

Engin ástæða til að spá hamfaragosi

„Þetta er svona það sem við höfum séð áður á sumrin, svona svolítil sumarvirkni í Mýrdalsjökli, og það má segja að það hafi komið smá leki úr jarðhitakerfunum í gær sem var mjög minniháttar en vottar aðeins fyrir að þar væri jarðhitavatn í ánni.“

Í gær sagði Einar Pétursson jarðeðlisfræðingur að ekki þyrfti að koma á óvart að skjálftar mældust við Kötlu. Þar sem ekki væri vísbending um neinn gosóróa væri ekki tilefni til að óttast.

„Katla er náttúrlega fræg fyrir að vera með stöðuga skjálftavirkni þannig að það kemur ekkert á óvart. Það sem hefur kannski heldur komið á óvart er hvað hún er búin að vera óvenjuróleg síðustu árin. Núna er hún að ná sínu venjulega ástandi,“ sagði Einar.