Þyrla Gæslunnar gat ekki sinnt útkalli vegna bilunar

Sjaldgæft er að allar þyrlur Landhelgisgæslunnar séu óflughæfar.
Sjaldgæft er að allar þyrlur Landhelgisgæslunnar séu óflughæfar. mbl.is/Árni Sæberg

Þyrlur Landhelgisgæslunnar hafa verið óflughæfar í rúman sólarhring en óvænt bilun kom upp í TF-EIR sem olli þessu ástandi. Þyrlunni var komið í lag í kringum áttaleytið. Þetta segir Ásgeir Erlendsson, upplýsingafulltrúi Landhelgisgæslunnar, í samtali við mbl.is. 

„Klukkan fjögur barst Landhelgisgæslunni beiðni um aðstoð þyrlusveitar, en þar sem verið var að leggja loka hönd á lagfæringu TF-EIR var gripið til þess ráð að senda lækni þyrlunnar með séraðgerðasveit Landhelgisgælunnar sem ók með forgangsakstri til Hveragerðis þar sem læknirinn fór um borð í sjúkrabílinn og hélt þar áleiðis til Reykjavíkur,“ segir Ásgeir. 

Aukahlutir ekki á landinu

Hann bætir við að í þessari viku var gert ráð fyrir að TF-GNA og TF-EIR væru til taks á meðan TF-GRO væri í langtímaviðhaldsskoðun en óvæntar bilanir hafi sett strik í reikninginn. 

„Þessar bilanir eru ekki umfangsmiklar en þeir aukahlutir sem vantar til þess að TF-GNA verði flughæf eru ekki á landinu og þeirra er nú beðið. Flugvirkjar Landhelgisgæslunnar hafa unnið hörðum höndum síðasta sólarhringinn að laga TF-EIR.“

Þyrla Landhelgisgæslunnar.
Þyrla Landhelgisgæslunnar. mbl.is/Árni Sæberg

Ásgeir segir sjaldgæft er að allar þyrlur Landhelgisgæslunnar séu óflughæfar. Þyrlurnar hafa flogið meira en í meðal mánuði vegna fjölda verkefna og æfinga. Síðan var einnig mikið álag á flugdeild Landhelgigæslunnar um verslunarmannahelgina. 

„Þessi staða getur komið upp og hefur gert það áður en það er sjaldgæft en alvarlegt þegar svona gerist.“

mbl.is

Bloggað um fréttina