44 greindust með kórónuveiruna innanlands síðasta sólarhringinn. Þetta kemur fram á Covid.is. 19 voru í sóttkví við greiningu, eða rúm 43%. 524 eru núna í einangrun, sem er fækkun um 20 á milli daga. Þrír greindust á landamærunum og er beðið eftir mótefnamælingu í öllum tilvikunum.
Rétt eins og í gær eru sjö á sjúkrahúsi með Covid-19, þar af einn á gjörgæslu.
897 eru í sóttkví, sem er 33 færra en í gær. Tekin voru 3.100 sýni, þar af 1.401 hjá fólki með einkenni.
Á höfuðborgarsvæðinu eru 328 manns í einangrun og líkt og áður eru næstflestir í einangrun á Suðurnesjum, eða 89. Af þeim sem eru í einangrun eru átta börn undir eins árs aldri.
37 börn á aldrinum eins til fimm ára eru í einangrun og 130 á aldrinum sex til tólf ára.
14 daga nýgengi á hverja 100 þúsund íbúa er komið niður í 8,5 á landamærum en innanlands er það 190,1.