Drífa og Halldór um víðan völl í dag

Drífa Snædal forseti ASÍ og Halldór Benjamín Þorbergsson framkvæmdastjóri Samtaka atvinnulífsins ræddu framtíð heilbrigðisþjónustu og komandi kosningar bæði á Sprengisandi Bylgjunnar og í Silfrinu í dag. 

Drífa sagði hættu á því að aukin einkavæðing í velferðarstofnunum verði til þess arður verði dreginn út úr ríkisstyrktum rekstri sem rati þannig í vasa auðugra eigenda sem nýti sér svo alls kyns fléttur til þess að hámarka ríkisstyrki.

Frétt af mbl.is

Glímir við vanda fortíðar þrátt fyrir aukið fjármagn

Nágrannaríki dásömuð

„Heilbrigðiskerfið er á ákveðnum krossgötum og það er undirliggjandi þrýstingur til þess að horfa til Bandaríkjanna, Bretlands eða Norðurlandanna og verið að dásama þau ríki. Það er vitað að stórkapítal í heiminum sjá mikil tækifæri í því að fara inn í velferðarþjónustu af því að ríkið greiðir það.“

Halldór Benjamín Þorbergsson sagði þessar áhyggjur Drífu óþarfar. Hann taldi litlar líkur á því að stórkapítal myndi ryðja sér til rúms á þessum markaði og benti á því samhengi á starfandi tannlæknastofur og sjúkraþjálfara.

„Við erum bara að segja að við þurfum sterkt kerfi við hliðina á þjóðarsjúkrahúsinu þar sem er farið í þessar risastóru aðgerðir. Meira að segja held ég að margir hafi lagt við hlustir þegar forstjóri Landspítalans steig fram í fjölmiðlum um daginn og sagði að auðvitað þyrfti að styrkja einkarekstur í heilbrigðiskerfinu til þess að þjóðarsjúkrahúsið geti sinnt sínu hlutverki með þeim hætti.“

Halldór setur auk þess spurningarmerki við heimatilbúnar lausnir verkalýðshreyfingarinnar og telur í því samhengi mun eðlilegra að líta til nágrannaríkja þar sem sátt ríki um fyrirkomulagið. 

• Blogga um frétt