Vel gekk að bjarga mönnunum er strönduðu slöngubát við Akurey í gærkvöldi. Ásgeir Erlendsson, upplýsingafulltrúi Landhelgisgæslunnar, segir að samhent átak Gæslunnar, björgunarsveita og lögreglu hafi þurft til.
Mennina rak á sker við Akurey um klukkan tíu í gærkvöldi með þeim afleiðingum að þeir lentu í sjónum, eins og kom fram í tilkynningu lögreglu til fjölmiðla í morgun.
Björgunarbátur Slysavarnafélagsins Landsbjargar var kallaður út ásamt björgunarsveitarfólki en Landhelgisgæslan stýrði aðgerðum á vettvangi.
Vel gekk að finna mennina og voru þeir fluttir um borð í bát sem sigldi með þá í land. Þar tóku sjúkrabílar á móti þeim og fluttu til skoðunar á sjúkrahúsi.
Af orðum Ásgeirs að dæma eru þeir ágætlega haldnir þrátt fyrir að hafa verið kaldir og hraktir í gær þegar þeim var bjargað.