„Það eru búnir að vera hérna bílar fastir uppi á heiðinni og við erum að koma fólkinu til byggða og svona. Það er svo hált hérna, blint og mikið rok,“ segir Hafsteinn Ingi Viðarsson, formaður björgunarsveitarinnar í Snæfellsbæ.
Hann segir björgunarsveitina hafa sinnt nokkrum verkefnum í dag vegna veðursins, aðallega við að koma fólki á bílum til byggða. „Flestir eru að keyra á sumardekkjum og það er snjór hérna á allri heiðinni og hálka þannig það er ekkert hægt að hafa fólk keyrandi um hérna,“ segir Hafsteinn.
„Akkúrat núna er snjókoma og frekar blint, allavega uppi á heiði hjá okkur og rosalega hvasst líka hérna niður í byggð.“
Hann segist vona að versta veðrið sé nú yfirstaðið og segir að útlit sé fyrir að farið sé að lægja.