Dregið hefur úr kjörsókn á höfuðborgarsvæðinu en hlutfall þeirra sem hafa nú greitt atkvæði sitt er lægra í Reykjavíkurkjördæmunum og Suðvesturkjördæmi en í síðustu alþingiskosningum árið 2017 ef miðað er við sama tíma dags.
Kjörsóknin fór vel af stað í morgun en hlutfall þeirra sem greitt höfðu atkvæði þá var aðeins hærra ef miðað var við kjörsóknina í síðustu alþingiskosningum. Eftir því sem liðið hefur á daginn hefur þó dregið úr því og benda tölurnar nú til þess að hlutfall þeirra sem greitt hafa atkvæði sé minna en árið 2017.
Klukkan fimm í dag höfðu 41,2% af kjörskrárstofni í Suðvesturkjördæmi kosið, er það 3,4 prósentustigum minna en kjörsóknin klukkan 17 í síðustu alþingiskosningum í sama kjördæmi.
Það sama má segja um Reykjavíkurkjördæmin en klukkan 18 í dag var kjörsóknin í báðum kjördæmum 48,28%, en árið 2017 var hún 51,8% á sama tíma dags.
Næstu kjörsóknartölur frá Suðvesturkjördæmi munu berast eftir klukkan 20. Tölurnar úr Reykjavíkurkjördæmunum eru uppfærðar á hverjum klukkutíma á vefsíðu borgarinnar.
Þetta fór gríðarlega vel af stað í morgun en nú eru Reykvíkingar 2017 dottin framúr okkur í kjörsókn og við getum ekki látið þetta rósagyllta, marmarafilmaða, slímföndrandi, fidget-spinnandi fólk vinna okkur! pic.twitter.com/RRsWVW6hmD
— Reykjavík (@reykjavik) September 25, 2021