Allir munir Miðgarðakirkju gjöreyðilögðust þegar kirkjan brann til grunna 21. september. Ítarleg umfjöllun um kirkjuna og gripina er í Kirkjum Íslands, 9. bindi.

Tryggingar flestra kirkna eru á forræði sóknanna. „Hver sókn er sjálfstæð fjárhags-og stjórnunareining,“ sagði séra Kristján Björnsson, vígslubiskup í Skálholti. „Kirkjur eru flestar tryggðar samkvæmt brunabótamati og það er frekar lágt.“

Kristján segir að kirkjugripir séu yfirleitt ekki tryggðir sérstaklega. Einstaka sinnum eru þó dýrir gripir, eins og t.d. pípuorgel, tryggðir. Það er ekki síst ef til þeirra hefur verið safnað. Eins krefjast lánveitendur stundum sérstakra trygginga þegar lánað er til kirkjubyggingar eða orgelsmíði.

Friðlýstar kirkjur eru á þriðja hundrað og allmargar þeirra sóknarkirkjur. Kristján sagði að oft hafi fámennar eða mannlausar sóknir verið sameinaðar öðrum. Þá fær sameinuð sókn í fangið gamla kirkju eða kirkjur tryggðar skyldutryggingu.

Nokkrar bændakirkjur eru í einkaeigu, en þeim hefur fækkað. Þannig var t.d. bændakirkjan Grundarkirkja í Eyjafirði afhent söfnuðinum. Tvær kirkjur eru í eigu ríkisins, Þingvallakirkja og Hóladómkirkja. Skálholtsdómkirkja og allar fasteignir í Skálholti eru eign þjóðkirkjunnar.

Söfnun fyrir kirkju í Grímsey

Kristján hvetur landsmenn til að styðja byggingu nýrrar kirkju í Grímsey í stað þeirrar sem brann með framlagi til sóknarinnar. „Ég mæli með kr. 10.000 á mann því það er nálægt því sóknargjöld einstaklings í eitt ár, eitt sóknarbarn til liðsauka í Miðgarðasókn!“ skrifaði Kristján á Facebook-síðu sinni. Reikningsupplýsingar sóknarinnar eru banki 565-04-250731 og kt. 460269-2539.