Söguleg loðnuráðgjöf skapi meiri tekjur og hagvöxt

Bjarni Benediktsson, fjármála- og efnahagsráðherra.
Bjarni Benediktsson, fjármála- og efnahagsráðherra. mbl.is/Eggert Jóhannesson

Bjarni Benediktsson, fjármála- og efnahagsráðherra, er ánægður með fréttir morgunsins um gríðarstóra hækkun aflamarks til loðnuveiða. 

Hann segir að þetta skapi tækifæri fyrir smærri byggðir úti á landi og sé jákvætt fyrir íslenskt hagkerfi, sem enn réttir úr kútnum eftir efnahagslægð af völdum heimsfaraldurs. 

Í morgun var tilkynnt að Hafrannsóknarstofnun ráðleggði allt að 904.200 tonna loðnuveiði fyrir komandi vertíð. Það er þriðja stærsta mæling í sögunni og sú stærsta í tvo áratugi. 

Þetta eru góðar fréttir, ekki síst fyrir einstaka byggðir í landinu. Undanfarin ár höfum við horft upp á loðnubrest, en það er einungis vegna fleiri öflugra stoða í hagkerfinu sem áfallið fyrir íslenskan efnahag í heild hefur ekki verið meira en raun ber vitni,“ segir Bjarni í svari við fyrirspurn mbl.is. 

Hækkandi útflutningstekjur og meiri hagvöxtur

Bjarni segir að ekki þurfi að tvíræða um þýðingu þessa fyrir íslenskt atvinnulíf og íslenskt samfélag. 

Með stórauknu aflamarki nú myndum við sjá fram á umtalsvert meiri útflutningstekjur og hagvöxt umfram væntingar á næsta ári,“ segir hann. 

Þar að auki er ráðgjöf Hafrannsóknarstofnunar mikil innspýting fyrir hagkerfi, sem enn er að ná sér á full skrið eftir faraldurinn. 

Þannig bætist enn í góðar horfur og líkurnar aukast á að við getum vaxið enn hraðar út úr kórónukreppunni á komandi misserum,“ segir Bjarni.

mbl.is
Loka