Metþátttaka í Hverfið mitt

Kosningaþátttaka í íbúalýðræðisverkefninu Hverfið mitt hefur aldrei verið meira en í ár. Þegar kosningum lauk á hádegi í dag var kosningaþátttakan 16,4%, þ.e. 16,4% íbúa 15 ára og eldri höfðu greitt atkvæð. Þetta kemur fram í tilkynningu frá Reykjavíkurborg.

Hugmyndirnar sem valið stóð um voru 277 talsins en 111 þeirra hlutu kosningu og verða framkvæmdar. Öll hverfi Reykjavíkur slógu sín þátttökumet. Mesta þátttakan var á Kjalarnesi, en fast á hæla Kjalarness komu Árbær og Norðlingaholt.

Hér má sjá þátttökuna frá 2012-2021. Ljósmynd/Reykjavíkurborg

Þakka borgarbúum fyrir þátttöku

Alls tóku 18.389 íbúar þátt í kosningunni í ár en á kjörskrá voru 112.306 Reykvíkingar.

„Við viljum þakka borgarbúum fyrir að taka þátt í kosningunni, og leggja sitt af mörkum í átt að auknu íbúalýðræði. Það er það sem þetta gengur allt út á að stuðla að betri hverfum með innsýn og aðkomu borgarbúa,“ er haft eftir Eiríki Búa Halldórssyni, verkefnastjóra, í tilkynningu.

Frétt af mbl.is

Tillögurnar stærri og peningarnir meiri

Verkefnin sem kosin voru til framkvæmda núna eru 111 talsins og bætast við þau 787 verkefni sem hafa nú þegar orðið að veruleika í gegnum íbúalýðræðið í Hverfið mitt.

Í tilkynningunni segir að verkefnin verði framkvæmd næsta sumar og leitast verði við að hafa samráð við hugmyndasmiði um útfærslu verkefna - ekki síst í þeim tilfellum þegar þarf að breyta hugmyndum eða aðlaga.

• Blogga um frétt