Helgi Jóhannesson, sem starfaði sem yfirlögfræðingur Landsvirkjunar þangað til í lok október, lét af störfum eftir að hafa fengið formlega áminningu í starfi vegna ótilhlýðilegrar háttsemi í garð kvenkyns starfsmanns hjá fyrirtækinu.
Stundin greinir frá því samkvæmt heimildum að starfsmaðurinn hafi kvartað með formlegum hætti til yfirstjórnar Landsvirkjunar í vor. Helgi hafi ítrekað farið yfir mörk konunnar og áreitt hana með orðum og gjörðum.
Skömmu áður en Helgi hætti sagði konan upp á starfsmannasviði Landsvirkjunar á þeim forsendum að hún gæti ekki unnið á sama vinnustað og hann.
Hegðun Helga snerist um óviðeigandi orð, auk þess sem hann strauk henni í framan gegn hennar vilja. Landsvirkjun sagðist við Stundina ekki geta tjáð sig um málefni einstakra starfsmanna. Helgi vildi heldur ekki tjá sig um málið.