Íshellan yfir Grímsvötnum hafði seint í gærkvöldi sigið um rúma tuttugu metra frá því fyrst fór að bera á sigi fyrir um tíu dögum, að því er fram kemur í Morgunblaðinu í dag.

Þetta sýndu síðustu mælingar en áfram verður fylgst með mælingum í dag. Vatnamælingamenn Veðurstofunnar mældu rennsli í Gígjukvísl um klukkan átta í gærkvöldi og nam það þá um 1.140 rúmmetrum á sekúndu.

Rafleiðni í ánni eykst

Rennslið er tífalt á við venjulegt rennsli árinnar á þessum árstíma.

Rafleiðni, sem gefur til kynna magn hlaupvatns í ánni, hefur einnig aukist síðustu daga. Gas mælist í litlu magni við jökulsporðinn og þykir vel innan hættumarka.

Gosið hefur á fimm til tíu ára fresti úr Grímsvötnum og hefur vísindamönnum komið saman um að mælingar sýni að Grímsvötn séu tilbúin til að gjósa, eins og Morgunblaðið hefur áður fjallað um.

Í tilkynningu frá Veðurstofunni segir að ekkert sé þó hægt að fullyrða um að eldgos verði samfara þessu hlaupi og fylgjast þurfi grannt með skjálftavirkni í Grímsvötnum sem geti gefið vísbendingar um að gos sé yfirvofandi.

Í gærkvöldi hafði engin skjálftavirkni enn mælst. Árið 2004 gaus í Grímsvötnum eftir að jökulhlaup þaðan var komið vel af stað. Síðast gaus árið 2011, en þá um hálfu ári eftir jökulhlaup.

Tengdar fréttir

Hlaup úr Grímsvötnum

Ekkert bendir til goss eftir hlaupið

• Hlaupvatnið sem risastór kúla
• Litakóðinn aftur orðinn gulur
• Smáskjálftar við Grímsvötn
• Engin merki um kvikuinnskot

» Fleiri tengdar fréttir