Landsbjörg sendi nú í dag frá sér tilkynningu þar sem minnt er á viðvaranir frá Veðurstofu Íslands en víðast hvar á landinu eru gular viðvaranir í gildi og því ekkert ferðaveður. Það virðast þó ekki allir gera sér grein fyrir því.
Björgunarsveitir höfðu fyrr í dag verið kallaðar út í þrígang vegna tjóns sem veðrið hefur valdið. Björgunarsveitir voru ræstar út á Akranesi, á Hellu og í Þorlákshöfn vegna þessa.
Lausamunir höfðu fokið í storminum, fánastöng og fiskikör fuku þá einnig. Á Hellu þurfti síðan að koma matarvagni í skjól vegna veðurs.
Björgunarsveitirnar á Akureyri og á Suðurnesjum voru svo ræstar út nú um hálffjögur þar sem þakplötur tóku að fjúka. Þá eru björgunarsveitarmenn á leið sinni upp á Öxnadalsheiði til þess að aðstoða ökumenn nokkurra bíla sem sitja fastir uppi á heiði.