Hraðprófin sem veittu falskar jákvæðar niðurstöður tilheyrðu öll sömu sendingunni en líklega var um gallaða sendingu að ræða, að sögn Sigríðar Dóru Magnúsdóttur, framkvæmdastjóra lækninga hjá Heilsugæslunni á höfuðborgarsvæðinu.
Sturla Orri Arinbjarnarson, sérfræðingur í ónæmisfræði og framkvæmdastjóri Sameindar, sagði í Morgunblaðinu á laugardag að prófin frá Siemens, sem Sameind notast við, hefðu reynst vel og ekki gefið falskar jákvæðar niðurstöður.
„Við hjá heilsugæslunni fengum fölsk jákvæð próf í stuttan tíma en eftir að þeim var skipt út höfum við ekki lent í þessu,“ segir Sigríður.
Því eigi ekki lengur að vera mikil hætta á að fólk fái jákvæðar niðurstöður úr hraðprófum á vegum heilsugæslunnar að ósekju.
Nánar er greint frá málinu í Morgunblaðinu í dag.