„Unglingar hafa alls konar langanir“

Kynís, kynfræðingafélag Íslands, sendi frá sér yfirlýsingu í gærkvöldi í kjölfar umræðu um fræðslu um svokallaðar kyrkingar í kynlífi. Hanna Björg Vilhjálmsdóttir kynjafræðikennari hefur á síðustu dögum gagnrýnt slíka fræðslu Sigríðar Daggar Arnardóttur kynfræðings harðlega og sagt að hún sé að „normalísera ofbeldishegðun.“

Frétt af mbl.is

Skiptar skoðanir á fræðslu um „kyrkingar“

Sigríður, sem betur er þekkt sem Sigga Dögg, hefur aftur á móti sagt að mikilvægt sé að svara spurningum unglinga um kynlíf, sama hverjar þær séu. 

Kynís tekur undir það. 

„Góð kynfræðsla felur í sér að mæta unglingum þar sem þau eru og vera heiðarleg í samskiptum. Ef okkur sem kynfræðurum finnst óþægilegt að svara spurningunum unglinga þá þurfum við fyrst og fremst að skoða okkar eigin fordóma og fyrirfram gefnu hugmyndir, en ekki koma skömminni á þau.“

Staðreyndin sú að unglingar horfa á klám

Kynís bendir á að það sé á hreinu að unglingar horfi á klám og noti það á fjölbreyttan hátt. Þá sýni rannsóknir að sumir unglingar noti klám til þess að fræðast um kynlíf.

Frétt af mbl.is

Segir Siggu Dögg „normalísera ofbeldishegðun“

„Þess vegna er mikilvægt að spjalla um klám í kynfræðslu og kenna unglingum klámlæsi (e. porn literacy), sem meðal annars felst í því að eiga heiðarlegt samtal um að klám endurspegli ekki raunveruleikann,“ segir í yfirlýsingu Kynís.

„Unglingar hafa alls konar langanir sem spretta frá alls konar lífsreynslu. Kannski vaknar einhver forvitni við að horfa á klám og er því mikilvægt í kynfræðslu að búa ekki til skömm, heldur frekar fræða af virðingu og opnum hug.“

Þá segir í yfirlýsingunni að öll fræðsla miði að því að koma í veg fyrir slæmar afleiðingar og efla einstaklinginn í að eiga ánægjulega reynslu.

• Blogga um frétt