Innlent | mbl | 3.2.2022 | 5:40

Lýsti yfir sakleysi sínu í héraðsdómi

Dumitru segist ekki hafa grunað að Daníel væri slasaður eftir atvikið en ef hann hefði grunað það hefði hann hringt í neyðarlínuna. mbl.is/Árni Sæberg

Dumitru Calin, sem ákærður var fyrir manndráp af gáleysi og fyrir að hafa látið farast fyrir að koma manni til bjargar, þegar Daníel Eiríksson lést í Kópavogi í byrjun apríl á síðasta ári, lýsti yfir sakleysi sínu í Héraðsdómi Reykjaness í gær. Ríkisútvarpið greinir frá.

Frétt af mbl.is

Ákærður fyrir manndráp af gáleysi

Í ákæru kom fram að maðurinn ók bifreið á 15-20 km hraða út af bílaplani við Vindakór þrátt fyrir að Daníel héldi báðum höndum í hliðarrúðu á bílnum og þar af leiðandi dregist eða hlaupið með tæpa 14 metra þar til hann féll í jörðina.

Í framhaldinu hafi ákærði ekið af vettvangi án þess að huga að Daníel og með þeirri háttsemi stofnað lífi og heilsu Daníels í augljósan háska, að því er segir í ákærunni. Afleiðingar þessa alls voru að Daníel lést á sjúkrahúsi daginn eftir vegna höfuðáverka sem hann hlaut við fallið.

Segist hafa verið hótað með haglabyssu

Dumitru segist ekki hafa grunað að Daníel væri slasaður eftir atvikið en ef hann hefði grunað það hefði hann hringt í neyðarlínuna.

Hann lýsti fyrir dómi að þeir hafi hist fyrir utan heimili Daníels í Kópavogi þann 21. apríl 2021 til þess að eiga fíkniefnaviðskipti. Hvorugur þeirra hefði þó vitað hvern þeir væru að fara að hitta en fyrir atvikið höfðu þeir átt í hörðum deilum.

Dumitru segir Daníel hafa mætt vopnaður heim til hans og hótað honum vegna verðmæta sem hann hafi stolið. Brotaþoli hafi síðan sett aðra hönd í vasann nokkrum sinnum og ákærða grunað að hann væri vopnaður.

Fullyrti að hann hafi ekki haft annarra kosta völ

Dumitru fullyrti fyrir dómi að hann hefði ekki haft annarra kosta völ en að keyra af stað eða fara út úr bílnum og hlaupa burt, hann hafi ekki þorað út úr bílnum.

Fram kom að brotaþoli hafði ítrekað beðið ákærða um að stoppa bílinn sem hann hafi ekki gert fyrr en brotaþoli féll í jörðina.

Ákærða hafi ekki grunað að brotaþoli væri slasaður þar sem hann segist hafa séð í baksýnisspegli bílsins að Daníel hafi reynt að standa aftur á fætur og elta bílinn.