„Þetta bætir í reynslubankann,“ segir Wilhelm Wessman, varaþingmaður Flokks fólksins, í samtali við mbl.is.
Hann tók í dag sæti á Alþingi í fjarveru Ingu Sæland og er elsti varaþingmaðurinn sem tekið hefur sæti á Alþingi í fyrsta sinn, 79 ára og 159 daga gamall.
Wilhelm, sem unnið hefur sem hótelstjóri og í veitingageiranum áður, segir að sér lítist vel á hinn nýja vinnustað. Fyrsti dagurinn hafi í það minnsta gengið áfallalaust fyrir sig.
Wilhelm verður áttræður í október og segir spurður að hægt sé að bæta í hinn svokallaða reynslubanka eins lengi og maður lifir.
„Að mínu mati er það svo. Ég er búinn að reyna margt í lífinu og þetta er bara ein viðbótin,“ segir hann.
Wilhelm hefur unnið með Gráa hernum, baráttuhópi eldra fólks um lífeyrismál, undanfarin ár og segir skerðingamál og kjör aldraðra sér hugleikin. Að þeim málum muni hann berjast fyrir þá daga sem hann situr á Alþingi.
Hvernig er manni á þínum aldri tekið af öðrum þingmönnum?
„Ég sit hér í góðum hópi og sé engan í fýlu. Mér er vel tekið hérna.“