Lögregla framkvæmdi húsleit á heimili Karls Wernerssonar, eins af fyrr­ver­andi aðal­eig­end­um fjár­fest­inga­fé­lags­ins Milest­one, í gær. Þá leitaði lögregla einnig á vinnustað Karls, heimili fjölskyldumeðlima hans og fleiri einstaklinga. Karl sendi frá sér yfirlýsingu vegna málsins nú í morgun og segir hann þar að yfirvöld hafi ofsótt hann vegna meintra bókhaldsbrota á árunum fyrir hrun.

Frétt af mbl.is

Ríkið viðurkennir brot gegn fimm manns

„Mál vegna þessa hafa nú tekið 14 ár á þessu ári með viðeigandi óvissu fyrir alla aðila. Á þeim tíma hafa fallið dómar og áfrýjanir hafa orðið að frekari dómum. Ég hef setið í fangelsi, verið á áfangaheimili og verið í stofufangelsi,“ segir í yfirlýsingu Karls.

Ríkið viður­kenndi fyrr á þessu ári að brotið hefði verið á rétti Karls, og fleira fólks, til rétt­látr­ar málsmeðferðar í mál­um sem höfðuð voru gegn þeim eft­ir fjár­mála­hrunið árið 2008. Greiddi ríkið fólkinu um 1,8 milljónir króna á mann vegna þessa. 

Frétt af mbl.is

Fallist á endurupptöku í Milestone-málinu

Var dæmdur til þriggja og hálfs árs fangelsisvistar

Karl óskaði eftir endurupptöku Milestone-málsins svokallaða, ásamt tveimur öðrum, og samþykkti endurupptökudómur það í byrjun árs.

Í málinu var Karl fundinn sekur – ásamt bróður sínum Steingrími og Guðmundi Ólasyni fyrrverandi forstjóra Milestone – fyr­ir að hafa látið Milest­one fjár­magna kaup bræðranna á hluta­fé syst­ur þeirra, Ing­unn­ar, í fé­lag­inu. Hafi verið með öllu óvíst frá hverj­um, hvenær eða með hvaða hætti Milest­one fengi fjár­mun­ina til baka. 

Héraðsdóm­ur hafði áður sýknað í mál­inu en Hæstirétt­ur sneri dóm­in­um við og sagði að um­rædd­ir fjár­mögn­un­ar­samn­ing­ar hefðu eng­ar skuld­bind­ing­ar lagt á Milest­one held­ur ein­göngu Karl og Stein­grím en þrátt fyr­ir það hafi fé­lagið verið látið efna samn­ing­ana við Ing­unni upp á tæp­lega 5,1 millj­arð króna. Þannig hefðu þeir mis­notað aðstöðu sína hjá Milest­one. Voru þeir jafn­framt sak­felld­ir fyr­ir umboðssvik og fyr­ir meiri­hátt­ar brot gegn lög­um um bók­hald og árs­reikn­inga og að hafa rang­fært efna­hags­reikn­inga fé­lags­ins.

Karl var dæmdur til þriggja og hálfs árs fangelsisvistar.

Frétt af mbl.is

Fangelsisdómar í Milestone-málinu

Í yfirlýsingu sinni vísar Karl í niðurstöðu endurupptökudómsins:

„….með vísan til þeirrar meginreglu sakamálaréttarfars að sönnunarbyrði um sekt ákærðu hvíli á ákæruvaldinu og að allan vafa um sök hans beri a meta honum í hag, sbr. 108. gr. laga nr. 88/2008 og 2. mgr. 70. gr. stjórnarskrárinnar, þykir rétt með hliðsjón af framangreindu og eins og atvikum máls er háttað, að leggja til grundvallar að verulegir gallar hafi verið á meðferð máls endurupptökubeiðanda fyrir Hæstarétti í máli nr. 74/2015 sem hafi haft áhrif á niðurstöðu þess. Samkvæmt því verður fallist á beiðni endurupptökubeiðanda….“

„Eru 14 ár í ofsóknum ekki nóg?“

„Í kjölfar þessarar niðurstöðu hjá Mannréttindadómstól Evrópu og Endurupptökudómi og í kjölfar þess að sakamálið er aftur komið til meðferðar hjá Hæstarétti, virðist yfirvöldum þykja viðeigandi að hefja ofsóknirnar upp á nýtt með húsleit á heimili mínu, vinnustað mínum og heimili fjölskyldumeðlima ásamt fleiri aðilum,“ segir í yfirlýsingu Karls.

Þá segir Karl að útlit sé fyrir að tilgangur yfirvalda sé sá að aðstoða þrotabú hans vegna dómsmála sem það rekur nú í dómskerfinu.

„Ekki er talið nóg að þrotabúið reyni að sækja fjármuni heldur ákveður yfirvaldið að rétt sé, þegar von er á dómi á næstu dögum, að hefja sakamálarannsókn.“

Í yfirlýsingunni spyr Karl hvort tímasetningin sé tilviljun. 

„Er það tilviljun að hafin sé sakamálarannsókn á grundvelli gamallar kæru nokkrum dögum fyrir dómsniðurstöðu í tengdu einkamáli? Er þörf á húsleit vegna viðskipta sem eru 8 ára gömul? Eða er kannski verið að reyna að hafa áhrif á dómara sem eru þessa dagana að kveða upp dóm? Eru mannréttindi bara sumra en ekki annarra? Hvenær sættir yfirvaldið sig við að tilefnið var ekkert og nú sé nóg komið af stöðugum inngripum inn í líf fólks?“

Karl endar yfirlýsingu sína á eftirfarandi orðum: „Eru 14 ár í ofsóknum ekki nóg?“

Úrsk­urður end­urupp­töku­dóms í máli Karls

Fréttin hefur verið uppfærð

Tengdar fréttir

Milestone-málið

Endurupptökubeiðni Karls hafnað

• Hafnaði endurupptökubeiðni Steingríms
• Milestone-málinu vísað frá Hæstarétti
• Greiða um 200 milljónir úr þrotabúi Milestone
• „Þessi kæra var ekki að detta í hús í gær“

» Fleiri tengdar fréttir

• Blogga um frétt