Innlent | mbl | 30.3.2022 | 20:09 | Uppfært 16.1.2023 13:42

Lít ekki á þetta sem dauðadóm yfir verkefninu

Hannes Sigurbjörn Jónsson formaður KKÍ, Bjarni Benediktsson frjámálaráðherra, Katrín Jakobsdóttir forsætisráðherra og Guðbjörg Norðfjörð, varaformaður KKÍ. mbl.is/Eggert Jóhannesson

Formenn Handknattleiks- og Körfuknattleikssambanda Íslands segjast hafa fundið fyrir miklum pólitískum vilja til að reisa nýja þjóðarhöll sem myndi leysa Laugardalshöllina af hólmi varðandi landsleiki í íþróttagreinunum tveimur.

Laugardalshöllin hefur verið á undanþágu síðustu árin hjá Handknattleiks- og Körfuknattleikssamböndum Evrópu. Óvíst er hversu lengi erlendir aðilar munu leyfa Íslendingum að leika landsleiki í Laugardalshöllinni þar sem hún stenst ekki lengur ýmsar alþjóðlegar kröfur varðandi öryggismál, áhorfendur, sjónvarpsútsendingar og fleira.

Frétt af mbl.is

Bannað að spila í Laugardalshöll

Engin tíðindi hafa borist af mögulegri byggingu á nýju mannvirki síðustu vikurnar en ekki er gert ráð fyrir þjóðarleikvöngum fyrir íþróttir í fjármálaáætlun ríkisstjórnarinnar 2022 - 2027 sem kynnt var í gær.

„Auðvitað myndi maður vilja heyra meira afgerandi yfirlýsingar frá stjórnvöldum en þetta er ekki alveg svartnætti fyrir mér. Ég finn alveg að það er mikill vilji til að reyna að keyra þetta mál áfram. Hef sérstaklega fundið fyrir því hjá núverandi menntamálaráðherra og hvernig hann hefur stýrt þessu. Ég geri ráð fyrir að afstaða liggi fyrir á næstu tveimur vikum og þá verði farið í útfærslu á þessu,“ sagði Guðmundur B. Ólafsson, formaður Handknattleikssambands Íslands, þegar mbl.is ræddi við hann í dag.

Guðmundur B. Ólafsson formaður HSÍ fyrir miðri mynd. Til vinstri er landsliðsþjálfari karla, Guðmundur Þ. Guðmundsson, og hægra megin er landsliðsfyrirliðinn Aron Pálmarsson. mbl.is/Kristinn Magnússon

Ekki slegið út af borðinu

Í gær fór af stað mikil umræða og umfjöllun um málið þar sem þjóðarleikvanga var ekki að finna í fjármálaáætlun ríkisstjórnarinnar til 2027.

„Ég átta mig ekki alveg á því hvað það þýðir að þjóðarleikvangar séu ekki inni í þessari fjármálaáætlun. Svona plagg er náttúrlega breytanlegt og er ekki fast til fjögurra ára. Ég held að það liggi í augum uppi. Skýringin á því að íþróttamannvirkin séu ekki þarna inni er væntanlega sú að ekki eru komnar tölur á blað um heildarkostnaðinn. Eflaust er fólk þá að spá í alla þrjá leikvangana sem eru í burðarliðnum: þjóðarhöllina, frjálsíþróttavöllinn og þjóðarleikvanginn. Líklega á eftir að forgangsraða áður en þetta verður sett inn í áætlun um fjárlagagerð.“

Guðmundur vill að svo stöddu ekki slá þann möguleika út af borðinu að einkaframkvæmd verði fyrir valinu.

„Ein útfærslan væri að fara í einkaframkvæmd og þá myndi þetta hafi miklu minni áhrif á fjárlagagerðina ef við gerum þetta með þeim hætti. Það gæti jafnvel verið skynsamlegast að fara þá leið eins og gert var þegar Laugardalshöllin var stækkuð. Þá var stofnað rekstrarfélag sýningarhallar og Laugardalshallar. Þar af leiðandi met ég stöðuna ekki þannig að fjármálaáætlunin til 2027 sé dauðadómur yfir verkefninu. Ég á ekki von á því að verið sé að afskrifa verkefnið fram til 2027,“ sagði Guðmundur B. Ólafsson.

„Nú þarf ríkisstjórnin að klára málið“

Hannes Sigurbjörn Jónsson, formaður Körfuknattleikssambands Íslands, segir fjármálaáætlunina hafa komið sér á óvart.

„Þetta var virkilega svekkjandi og ég var svolítið sleginn yfir því að verkefnið væri ekki í fjármálaáætlun. Mikil vinna hefur átt sér stað í þessum á undanförnum árum og sérstaklega á allra síðustu árum. Ég myndi segja að mikil og góð vinna hafi verið unnin á síðasta eina og hálfa árinu eða svo. Ríkisstjórnin var með þetta í stjórnarsáttmálanum í september og ráðherrar íþróttamála hafa verið áhugasöm.

Bæði núverandi [Ásmundur Einar Daðason] og sú sem var á undan honum [Lilja Dögg Alfreðsdóttir]. Ráðherra íþróttamála gaf það mjög sterkt út að landsliðin verði nánast farin að spila í nýrri þjóðarhöll áður en kjörtímabilinu lýkur. Þar af leiðandi ætti þetta að vera í fjármálaáætlun til ársins 2027. Við vissum að þetta yrði ekki á fjárlögum fyrir næsta ár en ef við ætlum að byrja á þessu þá verður að gera ráð fyrir fjármunum í þetta verkefni,“ sagði Hannes þegar mbl.is ræddi við hann í dag.

Liggur fyrir hver kostnaðurinn við höllina gæti verið?

„Ef við tölum um höllina fyrir innanhússíþróttir þá hefur þetta verið gróflega reiknað og gæti verið á bilinu 6 - 8 milljarðar. Númer eitt, tvö og þrjú er að búið er að ræða þetta fram og til baka. Búið er að skipa nógu margar vinnunefndir og funda nógu mikið. Nú þarf ríkisstjórnin að klára málið annað hvort með Reykjavík eða öðru sveitarfélagi.

Það er skýrt frá okkur að við viljum helst hafa húsið í Laugardalnum. Það þarf að afgreiða og þá er hægt að byrja að teikna og byggja en það þarf peninga til að gera það. Skilað hefur verið skýrslum um þjóðarleikvanga þar sem er að finna hugmyndir. En áður en að fyrsta skóflustunga er tekin þá þarf að fara í ákveðna grunnvinnu og hún kostar.“

Ásmundur Einar Daðason, fer með íþróttamálin í ríkisstjórninni. Ljósmynd/Morgunblaðið

Trúir því að eitthvað gerist

Eins og Guðmundur þá lítur Hannes svo á að enn sé möguleiki að hreyfing verði á málinu í náinni framtíð.

„Ég vil taka það fram að ég hef trú á að eitthvað muni gerast í þessu. Ég velti því fyrir mér hvort gerð hafi verið einhvers konar mistök hjá ríkisstjórninni varðandi þjóðarleikvanga í þessari fjármálaáætlun. Á allra síðustu mánuðum og vikum hef ég setið fundi með samráðsfundi ráðuneytanna þar sem sitja aðstoðarmenn forsætisráðherra, menntamálaráðherra og fjármálaráðherra.

Þar er verið að teikna upp hugmyndir að þjóðarleikvöngum. Ég vil því ekki bara vera neikvæður. Ég ætla að trúa því að þetta muni lagast. Hægt er að gera breytingar á fjármálaáætluninni og ég trúi því að fjármálaráðherra muni gera það á allra næstu dögum svo þjóðarleikvangarnir fari þarna inn. Ég er bjartsýnn á að það verði en við verðum að fara að sjá það,“ sagði Hannes S. Jónsson við mbl.is í dag.