Fimmtu mótmælin vegna sölu ríkisins á hlut sínum í Íslandsbanka voru haldin í dag. Bæði var mótmælt á Austurvelli í miðbæ Reykjavíkur og á Ráðhústorgi á Akureyri.

Ræðumenn að þessu sinni voru þau Drífa Snædal forseti ASÍ, Bragi Páll Sigurðsson rithöfundur og Björn Leví Gunnarsson þingmaður Pírata.

„Stærstu trommur landsins verða barðar og fólki gefst tækifæri til að fella ríkisstjórnina með þremur boltum,“ sagði í lýsingu á viðburðinum á Facebook.

Þá komu ýmsir listamenn fram, þeirra á meðal voru Guðmundur Pétursson tónlistamaður, Einar Már Guðmundsson rithöfundur og skáld og dúettinn Down & Out sem söng um sægreifa.

Boðið var upp á kaffi, kakó og kleinur.