Maðurinn sem handtekinn var eftir hnífstunguárás í miðbæ Reykjavíkur þann fimmtánda apríl, er enn í gæsluvarðhaldi.
Rannsókn gengur ágætlega að sögn Margeirs Margeirssonar, aðstoðaryfirlögregluþjóns miðlægrar rannsóknardeildar. Hann kveðst þó ekki geta tjáð sig nánar um einstaka þætti málsins sem er enn á rannsóknarstigi.
Tveir karlmenn voru handteknir vegna hnífstunguárásar, en þeir eru grunaðir um að hafa stungið mann með eggvopni fyrir utan skemmtistaðinn Prikið. Sá sem ráðist var á hlaut lífshættulega áverka og var fluttur með hraði á sjúkrahús þar sem hann gekkst undir aðgerð.
Farið var fram á þriggja vikna gæsluvarðhald yfir öðrum manninum þann 16. apríl, en það var svo framlengt.
Árásarmenn og fórnarlamb eru karlmenn í kringum tvítugt.