Fjórtán líkamsárásir voru tilkynntar til lögreglunnar á höfuðborgarsvæðinu um helgina, þar af fjórar alvarlegar. Þá var farið í þrjú útköll vegna heimilisofbeldis og eitt vegna ráns.
Þetta kemur fram í yfirliti lögreglunnar.
Þá bárust tvær tilkynningar um innbrot og einnig komu nokkur fíkniefnamál á borð lögreglu um helgina, en m.a. var ein kannabisræktun stöðvuð í umdæminu og lagt hald á um hundrað kannabisplöntur.
Þá voru fjarlægð skáningarmerki af tugum ökutækja, sem voru ótryggð og/eða óskoðuð. Og að venju voru líka fjölmörg mál þar sem aðstoða þurfti fólk sem var ölvað og/eða í annarlegu ástandi.
Lögreglan greinir ennfremur frá því, að 22 hafi verið teknir fyrir ölvunar- og fíkniefnaakstur á höfuðborgarsvæðinu um helgina. Tólf þeirra voru stöðvaðir í Reykjavík, sjö í Kópavogi og einn í Hafnarfirði, Garðabæ og á Seltjarnarnesi.
Þrír voru teknir á föstudagskvöld, átta á laugardag, níu á sunnudag og tveir aðfaranótt mánudags. Þetta voru nítján karlar á aldrinum 18-46 ára og þrjár konur, 30-58 ára. Þrír þessara ökumanna höfðu þegar verið sviptir ökuleyfi og fjórir hafa aldrei öðlast ökuréttindi. Til viðbótar stöðvaði lögreglan för fjögurra réttindalausra ökumanna og var þeim öllum gert að hætta akstri.