„Dyngjan er sem stendur eina áfangaheimilið sem eingöngu er ætlað fyrir konur í Reykjavík. Það er afar mikilvægt að fleiri slík heimili verði sett á laggirnar.“
Þetta kemur fram í skriflegu svari Hólmfríðar Helgu Sigurðardóttur, upplýsingafulltrúa velferðarsviðs Reykjavíkurborgar.
Útlit er fyrir að loka þurfi áfangaheimilinu Dyngjunni um mánaðamótin ef ekkert verður að gert. Heimilið tók til starfa árið 1988 og hefur starfað óslitið síðan. Dyngjan er eina áfangaheimilið á landinu sem er einungis ætlað konum en þar mega börn kvennanna einnig dvelja.
Heimilið á nú í miklum fjárhagserfiðleikum eftir kórónuveirufaraldurinn og var því neitað um styrk frá félagsmálaráðuneytinu.
Fulltrúar velferðarsviðs Reykjavíkurborgar munu eiga fund með Dyngjunni á miðvikudag, til þess að fá betri mynd af stöðunni sem upp er komin á áfangaheimilinu, að sögn Hólmfríðar.
„Dyngjan fær styrk frá Reykjavíkurborg til starfsemi sinnar á grundvelli reglna um styrki til áfangaheimila en auk þess er Reykjavíkurborg eigandi húsnæðis Dyngjunnar.“
Að jafnaði tekur Dyngjan á móti 24 til 40 konum á ári og meðallengd dvalar þeirra er 90 til 180 dagar.
Árið 2020 varð starfsmönnum á velferðarsviði þó ljóst að meira þyrfti ef duga skyldi. Í kjölfarið var samþykkt að opnað yrði áfangaheimili til viðbótar við Dyngju á vegum borgarinnar.
Það er nú loks tilbúið og mun nýtt áfangaheimili í nýuppgerðu húsi miðbæ Reykjavíkur opna í sumar. Þar verða tólf 30 til 40 fermetra íbúðir, þar sem mæður geta dvalið með börn sín.
Hólmfríður segir að fyrstu konurnar muni flytja inn í júní. Þetta heimili verður rekið af borginni, en ljóst sé að það hafi verið hugsað sem viðbót við Dyngjuna, ekki staðgengill.