Björn Hjálmarsson, yfirlæknir á barna- og unglingageðdeild Landspítala, biðst afsökunar á þeim ummælum sem höfð voru eftir honum í Stundinni í morgun.
Þar var haft eftir honum að hann hafi efasemdir um vísindalegar forsendur þeirra meðferða sem Landspítalinn veitir transbörnum og ungmennum.
„Þetta er rangt og ég biðst velvirðingar á þeim orðum. Sú þjónusta sem transteymi BUGL veitir börnum og ungmennum byggir á alþjóðlegum viðmiðum og gagnreyndum rannsóknum. Teymið er skipað þverfaglegum hópi sérfræðinga sem einsetur sér að veita skjólstæðingum okkar eins góða þjónustu og meðferð og nokkur kostur er á,“ segir á vef Landspítalans.
Í frétt Stundarinnar segir að Björn hafi sagt í tölvupósti að meðferðir við kynama, upplifun að einstaklingur sé ekki af því kyni sem honum var úthlutað við fæðingu, væru byggðar á „myrkri“, „aktivisma“ og „fákunnáttu“. Hér má lesa yfirlýsinguna í heild sinni.