Viðhaldsframkvæmdir hófust í fyrradag við Suðurbæjarlaug og Ásvallalaug í Hafnarfirði sem hafa áhrif á opnunartíma lauganna.
Vegna þessa verður aukið við opnun í Sundhöll Hafnarfjarðar og hún opin um helgar á meðan framkvæmdum stendur.
Árdís Ármannsdóttir, samskiptastjóri Hafnarfjarðarbæjar, segir í skriflegu svari við fyrirspurn mbl.is að sundlaugar Hafnarfjarðar séu vinsælar allt árið um kring og að alltaf sé vandasamt að finna réttan tíma fyrir framkvæmdir og viðhald innan lauganna.
Suðurbæjarlaug er lokuð vegna umfangsmikilla framkvæmda á meðan Ásvallalaug er opin að öðru leyti en því að 50 m kar laugarinnar er lokað tímabundið vegna flísaviðgerða. Umrætt kar er í mikilli notkun frá morgni til kvölds yfir vetrarmánuðina undir æfingar og mót og því þótti tímasetning framkvæmdanna núna henta betur þar sem þær myndu hafa sem minnst áhrif.
Spurð af hverju ákveðið var að ráðast í framkvæmdir á tveimur af þremur sundlaugum sveitarfélagsins á sama tíma segir hún að yfir vetrartímann sé í gangi skólasund, sundæfingar, sundnámskeið og fleira auk þess sem ekki er hægt að fara í framkvæmdir utanhúss sökum veðurfars, s.s. vegna frosts og snjós.
Enn fremur segir hún að sundstaðir Hafnarfjarðar séu í mikilli notkun fyrir skipulagt starf haust, vetur og vor. Skólaslit grunnskólanna voru í kringum 10. júní í Hafnarfirði, auk þess sem æfingum hjá sundfélögunum lauk um miðjan mánuðinn.
Í Ásvallalaug er unnið að því að laga flísar í laug, hljóðvist við barnalaug, lýsingu í laug, auk fleiri almennra viðhaldsverka. Í Suðurbæjarlaug er fyrirhugað að laga flísar í laug, loftræstingu og breyta útisvæði.
Aðspurð segir hún að endanlegur kostnaður umræddra framkvæmda liggi ekki fyrir.