Eldur kom upp í bíl við leikskóla í Vesturbergi 74 í Breiðholti í nótt.
Slökkviliðið á höfuðborgarsvæðinu var kallað út til þess að slökkva eldinn á milli klukkan eitt og tvö í nótt.
Kristján Sigfússon, innivarðstjóri hjá slökkviliðinu á höfuðborgarsvæðinu, segir í samtali við mbl.is að eldurinn hafi verið inni í fólksbíl en engin sérstök hætta hafi stafað að. Lítill reykur hafi komið frá bílnum og eldur verið innandyra sem gekk fljótt að slökkva.
„Yfirleitt ef það kviknar í innréttingum í svona bílum eru þeir mjög illa farnir,“ segir Kristján en ekki liggur nákvæmlega fyrir hvert ástand bílsins sé eftir eldinn.
Að sögn Kristjáns var um að ræða lítið útkall en ekki eru taldar vera skemmdir á öðrum bílum. Ekki er vitað hver upptök eldsins voru.
Á Facebook síðu slökkviliðsins á höfuðborgarsvæðinu kemur fram að fjórum útköllum hafi verið sinnt í nótt. Að auki eldsins í bílnum kom m.a. upp eldur í gróðri í Elliðárdalnum og minniháttar eldur út frá eldamennsku.