„Veður verður breytilegt eftir landshlutum um helgina, en alla jafna verður skýjað þótt stöku sinnum láti sólin sjá sig,“ segir Marcel de Vries, veðurfræðingur á Veðurstofu Íslands.
Á höfuðborgarsvæðinu verður skýjað með köflum yfir alla helgina og verður hitastigið á bilinu 10-14 gráður á morgun, en mun svalara á sunnudag. Vindur kemur úr norðvestanátt.
Suðurlandið verður að mestu leyti bjart og hitastig nær 15 gráðum, en skýjar þegar líður á helgina og dálitlar skúrir á sunnudag.
Á norðaustanverðu landinu verður kaldara en á öðrum landshlutum yfir helgina og fer hitinn ekki ofar 9 gráðum. Á austanverðu landi má búast við rigningu og einnig verða stöku síðdegisskúrir í öllum landshlutum.