Hinsegin-diskó, Eurovision-farar og gleðiganga

Hinseginhátíð Vesturlands verður haldin í annað sinn í Snæfellsbæ um helgina. Heimir Berg Vilhjálmsson, markaðs- og upplýsingafulltrúi Snæfellsbæjar, segir mikla stemmingu vera í íbúum Snæfellsbæjar fyrir hátíðinni en í tilefni hátíðarinnar hefur verið máluð regnbogagata í Ólafsvík.

Regnbogagatan er við Ólafsvíkurkirkju og Ólafsvíkurenni sem gjarnan er kallað Enni af heimamönnum. Ljósmynd/Heimir Berg Vilhjálmsson

„Það er ofboðslega góð stemming í bænum fyrir hátíðinni og mikil gleði og tilhlökkun í fólki. Íbúar og fyrirtæki eru byrjuð að skreyta sveitarfélagið með regnbogalitum og er gaman að sjá hve margir taka þátt,“ segir hann í samtali við mbl.is.

Páll Óskar, Systur og gleðiganga

Aðspurður segir hann heilmargt vera í gangi í tilefni hátíðarinnar í sveitarfélaginu.

„Til dæmis verða fyrstu opinberu tónleikar Systranna eftir Eurovision-ævintýrið þeirra á föstudaginn í Frystiklefanum á Rifi. Það verður miðnætursund í Lýsuhólslaugum og regnbogasundlaugardiskó í sundlauginni í Ólafsvík, skemmtidagskrá í Sjómannagarðinum í Ólafsvík og Hinsegin-diskó á veitingastaðnum Reks.

Þá verður Páll Óskar líka með ball á bæjarhátíðinni í Grundarfirði og verður boðið upp á hópferðir á það frá Ólafsvík. Hápunktur hátíðarinnar verður svo auðvitað Gleðigangan sem hefst um tvö leytið á laugardeginum í Ólafsvík. Gangan fylgir Ólafsbraut og beygir upp Kirkjutún, en þar er einmitt ný og glæsileg regnbogagata sem Snæfellsbær hafði frumkvæði að því að mála í tilefni hátíðarinnar.“

Hinseginhátíð Vesturlands er haldin daganna 22. til 24. júlí.

Ný regnbogagata Snæfellsbæjar

Spurður nánar út í regnbogagötuna segir hann götuna vera glænýja og að framtakið hafi nú þegar vakið mikla athygli, bæði hjá íbúum og gestum. Hann segir fjölmarga ferðamenn hafa gefið sig á tal við skippuleggjendur, tekið myndir af sér við götuna og skapað minningar þrátt fyrir að gatan sé enn ekki kominn „á kortið“.

Heiður Malín aðstoðaði við málningarvinnu. Ljósmynd/Aðsend

„Regnbogagatan er á fallegum stað í Ólafsvík þar sem hún er við kirkjuna, Ólafsvíkurenni, bæjarfossinn og höfnina. Það má í raun segja að gatan hafi alla burði til að verða ákveðið kennileiti fyrir Ólafsvík og vonandi er hún komin til að vera.“

Regnbogagatan er staðsett á besta stað í Ólafsvík. Ef gengið er niður götuna að höfninni þá má sjá pakkhúsið sem byggt var árið 1844. Þá eru veitingastaðirnir Sker og Reks í um 200 metra fjarlægð frá regnbogagötunni. Ljósmynd/Heimir Berg Vilhjálmsson

Sveitarfélagið styður sjálfsögð mannréttindi

Að sögn Heimis hefur hátíðin mikla þýðingu fyrir Snæfellsbæ, en hátíðin var haldin í fyrsta sinn í fyrra í Borgarnesi. 

„Það er okkur mikill heiður að fá að halda hátíðina með félaginu Hinsegin Vesturland sem var stofnað í fyrra til að auka sýnileika, stuðning og fræðslu um þetta málefni. Þau eru ævinlega öll velkomin til Snæfellsbæjar og sveitarfélagið styður sjálfsögð mannréttindi allra og margbreytileika mannlífsins.“

Ljósmynd/Heimir Berg Vilhjálmsson

Að endingu hvetur Heimir íbúa á Vesturlandi og víðar til að koma vestur og taka þátt í gleðinni.

„Veðurspáin á Snæfellsnesi lítur vel út fyrir helgina, málefnið er gott og hér er auðvitað hægt að gera sér glaðan dag á fjölmörgum veitingahúsum og hvergi betra að vera í góðra vina hópi á fallegum og björgum sumardegi.“

• Blogga um frétt