„Ég man ekki eftir því að hafa séð svona margt fólk“

Margmenni var í miðbæ Reykjavíkur í dag þar sem Gleðigangan var gengin. Álfur Birkir Bjarnason, formaður Samtakanna '78 segist ekki muna eftir því að hafa séð fleira fólk í og í kringum gönguna. 

„Ég man ekki eftir því að hafa séð svona margt fólk. Kannski er þetta einhver þorsti eftir svona göngu eftir Covid en ég held líka að fólk hafi fundið það hjá sjálfu sér að það væri kominn tími til þess að sýna samstöðuna í verki,“ segir Álfur. 

Stærstur hluti þjóðarinnar styðji hinsegin fólk

Undanfarið hefur verið rætt um bakslag í réttindabaráttu hinsegin fólks. 

„Ég fann bara meðbyr í dag og ég held að það sé akkúrat í bakslagi sem er mikilvægast að ganga til þess að sýna samstöðuna og styrkja hana. Ég held að meirihluta samfélagið hafi komið og sýnt að þau styðja við bakið á okkur. Það er mestur hluti þjóðarinnar sem vill veg okkar sem bestan.“

Álfur segist gríðarlega ánægður með það hversu margt fólk kaus að mæta og ganga með Samtökunum '78 undir slagorðinu „full fjármögnun“ en Samtökin '78 hafa talað fyrir aukinni fjármögnun fyrir málaflokkinn.

„Þetta var bara æðislegur dagur og æðisleg ganga og gaman að sjá allt þetta fólk.“