Anton Guðjónsson
Einar Bessi Gestsson náttúruvársérfræðingur hjá Veðurstofu Íslands segir í samtali við mbl.is í morgun að ekki hafi miklar breytingar orðið á gosinu frá því í gærkvöldi miðað við það sem sést á myndavélum.
„Skyggnið í nótt hefur komið og farið. Á myndavélum sést að hraunáin rennur áfram inn í Meradalinn,“ bætir Einar við.
Hann segir að þegar veður leyfir verði gerðar mælingar á staðnum og í flugi. Hvenær það verður er óvíst.
Eins og flestum er eflaust kunnugt hófst eldgos á miðvikudaginn í vestanverðum Meradölum á Reykjanesskaga. Síðan þá hafa þúsundir heimsótt gosstöðvarnar en þar var lokað vegna veðurs í nótt.